«ҲОМИЁНИ ВАТАН». Дар Донишгоҳи давлатии Бохтар барномаи ҳарбӣ-ватандӯстӣ доир гардид

БОХТАР, 23.02.2023. /АМИТ «Ховар»/. 21 феврал бахшида ба 30-солагии таъсиси Қувваҳои Мусаллаҳи Ҷумҳурии Тоҷикистон дар Донишгоҳи давлатии Бохтар ба номи Носири Хусрав таҳти унвони «Ҳомиёни Ватан» барномаи ҳарбӣ-ватандӯстӣ доир карда шуд. Дар ин хусус ба АМИТ «Ховар» дар донишгоҳи мазкур хабар доданд.

Роҳбарияти донишгоҳ иброз дошт, ки Қувваҳои Мусаллаҳи Ҷумҳурии Тоҷикистон бо талошҳои Президенти Ҷумҳурии Тоҷикистон муҳтарам Эмомалӣ Раҳмон таъсис ёфта, марҳилаҳои ниҳоят вазнинро тай кард ва имрӯз ба сипари боэътимоди Ватан мубаддал гаштааст.

Таъкид гардид, ки имрӯз Артиши миллӣ таъминкунандаи амнияти ҳар сокини ҷумҳурӣ буда, фаъолияти ниҳодҳои кудратӣ тибқи дастуру ҳидоятҳои Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон хуб ба роҳ монда шудааст.

Дар ҷамъомад намоиши машқҳои элементӣ, шеърҳо дар иҷрои хонандагони литсей ва донишҷӯёни донишгоҳ, намоиши ҷанги тан ба тан, арҷгузорӣ ба Парчами миллӣ бо маҳорати баланд пешниҳоди иштирокчиён гардонида шуд.

АКС: Донишгоҳи давлатии Бохтар ба номи Носири Хусрав