ПОНЗДАҲ СОЛ ДАР ФАЗО. Аз оғози фаъолияти Ширкати ҳавопаймоии «Сомон Эйр» 15 сол сипарӣ шуд
ДУШАНБЕ, 06.02.2023 /АМИТ «Ховар»/. Аз оғози фаъолияти Ширкати ҳавопаймоии «Сомон Эйр» 15 сол сипарӣ гардид. 5 феврали соли 2008 ҳавопаймои ширкат – Боинг 737-800 бори нахуст бо хатсайри Душанбе-Москва-Душанбе парвози мустақим иҷро намуд. Дар ин хусус ба АМИТ «Ховар» дар хадамоти матбуоти ин ширкати ҳавопаймоӣ хабар доданд.
Ҳоло ширкати ҳавопаймоӣ ба зиёда аз 25 самт, аз ҷумла Мюнхен, Дубай, Истанбул, Деҳлӣ, Теҳрон, Москва, Тошканд, Алмато, Урумчӣ ва дигар шаҳрҳои ҷаҳон парвозҳои мунтазам анҷом медиҳад.
Давоми солҳои сипаришуда ширкати ҳавопаймоӣ ба дастовардҳои зиёд- аз роҳандозии хатсайрҳои нав то шомил шудан ба ҳайати Ассотсиатсияи бонуфузи байналмилалӣ ноил гардидааст. Ширкати «Сомон Эйр» узви IATA (Ассотсиатсияи байналмилалии нақлиёти ҳавоӣ) буда, тасдиқномаи Агентии Аврупо оид ба бехатарии авиатсионӣ (EASA) ва шаҳодатномаи иҷозаи иҷрои парвозҳоро ба кишварҳои Иттиҳоди Аврупо соҳиб гардидааст.
Ширкати ҳавопаймоии «Сомон Эйр» ба стандартҳои байналмилалии бехатарии парвозҳо ҷавобгӯ буда, борҳо аз аудити IOSA (аудити бехатарии амалиётии IATA) гузашта, бо мукофоти корпоратсияи «Боинг», инчунин ҷоизаи «Бренди сол» қадрдонӣ шудааст.
Директори генералии Ширкати ҳавопаймоии «Сомон Эйр» Абдулқосим Валиев зимни табрики ҳайати кормандон бо солгарди фаъолият иброз дошт, ки «мо бо дастовардҳо ва касбияти кормандони худ ифтихор дорем. Ҳамеша саъй хоҳем кард, ки мавқеи худро ба ҳайси ширкати ҳавопаймоии минтақавӣ ва байналмилалӣ дар бозори парвозҳои ҳавоӣ боз ҳам мустаҳкам намоем. Мо аз мусофирон ва шарикон барои эътимодашон сипосгузорем ва албатта, барои ҷорӣ кардани намудҳои нави хизматрасонӣ ба мусофирон ва воридсозии технологияҳои нав пайваста кӯшиш менамоем».
Ёдовар мешавем, ки Парки ҳавопаймоии «Сомон Эйр» дар айни замон аз 6 ҳавопаймои Боинг – 737-800 ва 737-900 иборат мебошад.
Тавсеаи шабакаи парвозҳои ширкат, харидории ҳавопаймоҳои нави бароҳат, инчунин рушди парвозҳои дохилӣ ва минтақавӣ аз тасмимҳои наздиктарини ширкати ҳавопаймоӣ мебошанд.
АКС: Ширкати ҳавопаймоии «Сомон Эйр»
ОБЁРИИ ҚАТРАГӢ ЧӢ БАРТАРӢ ДОРАД? Шарҳи коршинос дар ин мавзуъ
Дар Тоҷикистон беш аз 14 ҳазор гектар шолӣ кишт карда шудааст
Хатсайри қатораи Душанбе – Москва — Душанбе пас аз 6 сол барқарор гардид
Дар Панҷакент корхонаи мурғпарварӣ ва ҳавзҳои моҳидорӣ ба фаъолият оғоз намуданд
Дар Тоҷикистон «Барномаи давлатии рушди инноватсионии соҳаи пахтакорӣ барои солҳои 2026–2030» қабул гардид
Намояндагони Тоҷикистон дар Форуми байналмилалии зиддикоррупсионӣ иштирок намуданд
Дар Тоҷикистон аввалин маҷмааи муосири истеҳсоли шиша бунёд мегардад
Дар ноҳияи Сино низоми «Пардохти ягонаи коммуналӣ» дар марҳилаи пилотӣ ҷорӣ мегардад
Тоҷикистон бо чанд давлати ҷаҳон муносибати савдои хориҷӣ дорад?
Дар Душанбе Форуми рушди технологияҳои иттилоотию коммуникатсионӣ баргузор шуд
Дар доираи ҷаласаи 45-уми Шурои идоракунандагони GCF барои Тоҷикистон 2 лоиҳаи нави муҳим ба маблағи 190 миллион доллар тасдиқ гардид
Дар Душанбе ҷараёни корҳои пешакии лоиҳаи сохтмони метро дар пойтахт муҳокима гардид
