Теъдоди ҳалокшудагони заминларзаи Туркия ба 17 674 нафар расид

ДУШАНБЕ, 10.02.2023 /АМИТ «Ховар»/. Теъдоди ҳалокшудагони заминларза дар Туркия то ба 17 674 нафар расида, 72 879 нафар маҷрӯҳ шудаанд. Ин маълумоти навшударо рӯзи чоршанбе ноиби президенти Туркия Фуат Октай тавассути телевизиони маҳаллӣ хабар дод, иттилоъ медиҳад АМИТ  «Ховар» бо истинод ба ТАСС.

«Мутаассифона, мо маҷбурем, ки оид ба афзоиши шумораи ҳалокшудагон гузориш диҳем. Ҳоло онҳо 17 674 нафарро ташкил медиҳанд. 72 879 нафар маҷрӯҳ шудаанд. Давоми шабонарӯзи гузашта аз зери харобаҳо тавонистанд 121 нафарро наҷот диҳанд», — баён дошт ӯ.

Ноиби президент Октай Фуат иброз дошт, ки дар музофоти Килис ва Шанлиурфа аллакай амалиёти кофтуковӣ ва наҷотдиҳӣ ба анҷом расидаанд.

«Дар музофоти Диёрбоқир, Одона ва Усмониё корҳои наҷотдиҳӣ асосан ба итмом расидаанд. Дар дигар вилоятҳои аз заминларза зарардида кӯшиши наҷот додани одамон дар биноҳои харобшуда идома дорад. Дар маҷмӯъ, дар ин кор беш аз 120 ҳазор нафар иштирок доранд. Бевосита дар ҷойҳои харобшуда  29,6 ҳазор нафар мутахассисон монеаҳоро бартараф мекунанд», — иттилоъ дод ноиби президент.

Азиза ДАДАБОЕВА,
АМИТ «Ховар»

АКС аз манбаъҳои боз