Дар Парлумони Тоҷикистон бахшида ба Рӯзи Модар ҳамоиши идона доир шуд

ДУШАНБЕ, 07.03.2023 /АМИТ «Ховар»/. Имрӯз дар арафаи  ҷашни  Рӯзи Модар дар Маҷлиси намояндагони Маҷлиси Олии Ҷумҳурии Тоҷикистон ҷамъомади идона баргузор шуд. Дар ин хусус АМИТ «Ховар» бо истинод ба котиби матбуоти Маҷлиси намояндагон хабар медиҳад.

Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода занони парлумони касбии мамлакатро табрик намуда,  иброз дошт, ки «Дар ситоиши зан-модар волотарин суханҳо гуфта шуда, зебопарасту озоданажод, диловару мубориз, бонангу номус, далеру шуҷоъ, ватандӯсту ватанпарвар, озодихоҳу адолатпарвар ва кадбонуву ҳунарманд будани бонувони  тоҷик ҳанӯз се ҳазор қабл дар матнҳои суғдиву паҳлавӣ ба таври барҷаста тасвир ёфтааст. Хизматҳои занон дар рушди  Тоҷикистон хеле назаррас мебошад».

Номбурда илова намуд, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба мақому манзалат, қадру қиммат ва изату эҳтироми занон арҷ гузошта,  барҳақ иброз намудаанд, ки «сатҳи маърифати ҷомеа ва нуфузу эътибори он аз рӯйи муносибат ба зан-модар муайян карда мешавад, аз руйи он арзёбӣ мегардад».

Гуфта шуд, ки маҳз меҳри беандозаи модар аст, ки Президенти Ҷумҳурии Тоҷикистон муҳтарам Эмомалӣ Раҳмон дар ҳар як Паёму мулоқоташон бо зиёиёни мамлакат саҳми занонро дар ҷомеа баланд арзёбӣ намуда, таъкид менамоянд, ки  соҳиби саводу маърифат ва илму дониш будани занону бонувон асоси оилаи солим ва албатта, омили муҳимтарини пешрафти ҷомеа  мегардад.

АКС: Маҷлиси намояндагони Маҷлиси Олии Ҷумҳурии Тоҷикистон