«КӢ БА МАҚСАД МЕРАСАД?». Таҳти ин унвон бахшида ба Наврӯз китоби қиссаҳои бачагона ба нашр расид

ДУШАНБЕ, 22.03.2023 /АМИТ «Ховар»/. Бахшида ба Наврӯзи фархундапай нависандаи маҳбуби тоҷик, дорандаи 7 ҷоизаи байналхалқӣ Шераки Ориён (Абдурофеъ Рабизода) китоби наверо таҳти унвони «Кӣ ба мақсад мерасад?» ба нашр расонд.

Тавре нависанда дар суҳбат бо хабарнигори АМИТ «Ховар» иброз дошт, китоб баҳри бачагону наврасон таҳия гардида, дар худ чил ҳикояро фаро мегирад.

Хонандаи наврас бо ба даст гирифтани ин китоб метавонад қиссаҳои ҷолибу хонданиеро, аз қабили «Афсонаи моҳтобӣ», «Се шарти меҳмондорӣ», «Сад соли умр», «Саргузашти гандум», «Ду одам ва ду хирс» ва дигар ҳикояву қиссаҳои аҷоибро мутолиа намояд.

Шераки Ориён доир ба бачагон филмномаҳо низ офаридааст, ба мисли филми тасвирии «Саргузашти гандум», «Шохчае, ки ба қаламча бадал ёфт», «Достони нур» ва филмҳои бадеӣ бо номҳои «Қадри дӯст», «Афсонаи зиндагӣ», ки ҷоизаҳои байналхалқиро сазовор гардидаанд.

Шераки Ориён муаллифи 43 филми бадеӣ, фалсафӣ, ҳунарӣ ва тасвирӣ ба шумор меравад.

АКС: АМИТ «Ховар»