Теъдоди ҳалокшудагони заминларзаҳои Туркия ба 48 ҳазор нафар расид

ДУШАНБЕ, 13.03.2023 /АМИТ «Ховар»/. Бар асари заминларзаҳои Туркия тақрибан 48 ҳазор нафар ба ҳалокат расид. Тавре ки АМИТ «Ховар» бо истинод ба ТАСС иттилоъ медиҳад, дар ин хусус рӯзи шанбе сардори Раёсати ҳолатҳои фавқулодаи Туркия Юнус Сезар хабар дод.

«Теъдоди умумии ҳалокшудагони заминларза дар айни замон аз миёни шаҳрвандони мо, инчунин шаҳрвандони хориҷӣ, бахусус суриягиҳо 47 ҳазору 975 нафарро ташкил медиҳад. Аз инҳо 6 ҳазору 278 нафар шаҳрванди хориҷӣ, асосан шаҳрвандони Сурия мебошанд», — хабар дод ӯ.

Дар минтақаҳои офати табиӣ беш аз 3000 мутахассиси наҷотдиҳанда боқӣ монда, корро идома медиҳанд. «Дар минтақа зилзилаҳои такрорӣ то ҳол идома доранд. Аз ин рӯ, мо гурӯҳҳои наҷотро дар ҳолати омодабош нигоҳ медорем. Тақрибан 300 наҷотдиҳандаи дигар давлатҳо низ дар он ҷо қарор дорад», баён намуд Юнус Сезар. Мувофиқи гуфтаи ӯ, дар маҷмуъ ҳудуди 16 ҳазор пасларза ба қайд гирифта шудааст, вале шиддати он дар даҳ рӯзи охир коҳиш ёфтааст.

Ӯ ҳамчунин ишора намуд, ки қисми зиёди захираи хаймаҳои ҷаҳонӣ барои ҷойгиркунии маҷруҳон ба Туркия интиқол дода мешавад. Ҳар рӯз аз хориҷи давлат 6 ҳавопаймо бо хаймаҳо  ворид мешавад.

Азиза ДАДАБОЕВА,
АМИТ «Ховар»

АКС аз манбаъҳои боз