«Ватанпарвар» дар Роштқалъа наврасонро ба хизмати Модар-Ватан омода менамояд

Март 29, 2023 16:50

ХОРУҒ, 29.03.2023 /АМИТ «Ховар»/. Бо ибтикори Маркази таҳсилоти иловагии ноҳияи Роштқалъа дар ҳамкорӣ бо Бошгоҳи техникию варзишии Вилояти Мухтори Кӯҳистони Бадахшон дар ноҳияи Роштқалъа Озмуни ҳарбию ватандӯстии «Ватанпарвар» баргузор гардид.

Ба мухбири минтақавии АМИТ «Ховар» Файз Мирасан дар Маркази таҳсилоти иловагии ноҳия хабар доданд, ки  «ҳамасола дар моҳи март, дар остонаи сафарбаркунии ҷавонон ба сафи Қувваҳои Мусаллаҳи Ҷумҳурии Тоҷикистон озмуни «Ватанпарвар» байни хонандагони синфҳои болоии ҷумҳурӣ баргузор мегардад. Масъулияти баргузории ин озмунро марказҳои таҳсилоти иловагии шаҳру ноҳияҳо ва Бошгоҳи техникию варзишии вилоят бар дӯш доранд. Шарти аввали ин озмун сафороӣ, гузашти низомӣ аст, ки дар ҳамаи қисмҳои низомӣ сарфи назар аз сохторашон ба он аҳамияти хос медиҳанд. Зеро ҳамаи наваскарон маҳз бо сафороӣ хизмати худро оғоз мекунанд. Бинобар ин ҳар ҷавон, қабл аз ҳама, бо қадамзании бонизом ва иҷрои амрҳои афсарон бояд аз наздик шиносоӣ дошта бошад. Яке аз ҳадафҳои ин мусобиқа низ такмил додани дониш ва малакаву маҳорати наврасон ва омода намудани онҳо барои хизмат дар сафи неруҳои низомии мамлакат аст. Агар наврасон то хизмати ҳарбӣ доир ба тарзу амали сафороӣ ва дигар намудҳои ҳарбию варзишӣ маълумоти хуби ибтидоӣ дошта бошанд, мушкилиҳои аввали хизмати низомӣ ба осонӣ пушти сар мешавад».

Шарти дуюми ин озмун аз ҳам ҷудо ва пайваст намудани ҷузъҳои автомати Калашников буд, ки аксарияти иштирокчиён- чӣ писару чӣ духтар аз уҳдаи иҷрои ин шарт ба хубӣ баромаданд.

Ба гуфтаи сардори Бошгоҳи техникию варзишии вилоят, ин шарт низ яке аз шартҳои муҳими озмуни мазкур шуморида мешавад. Чунки  наваскарон ба кадом қисми низомие, ки даъват нашаванд, ҳатман бо ин намуди силоҳ, ки дар ҷаҳон машҳур мебошад, рӯ ба рӯ мегарданд. Силоҳи мазкур дар аксари неруҳои низомии мамлакатҳои ҷаҳон истифода мешавад.

Таҳия ва нашри рӯзномаи девории «Ватанпарвар» яке аз дигар шартҳои ин озмун буд. Ҳайати ҳакамон ба қолаби рӯзнома, тарзи ороиши он, мавзую муҳтавои мақолаҳо эътибори асосӣ равона намуданд. Ба назар расид, ки аксари дастаҳо дар таҳияи рӯзномаашон заҳмати зиёд кашидаанд, то ки тамоми матлабҳояшон дархури замон бошад ва  маводе бошад,  ки дар тарбияи худшиносию ватандӯстии ҳамсолон нақш гузошта тавонад.

Ҳамин тавр, ҳайати ҳакамон ғолибонро муаяйн ва ба онҳо ифтихорномаву мукофоти пулӣ тақдим намуданд. Онҳое, ки дар намудҳои алоҳида мақоми аввалро гирифтанд, ба дастаи мунтахаби ноҳия шомил гардида,  дар озмуни вилоятӣ иштирок мекунанд.

Бояд зикр намуд, ки дастаи ноҳияи Роштқалъа чор сол пеш дар озмуни вилоятӣ ғолиб омад ва ба озмуни ҷумҳуриявӣ роҳхат гирифта, мақоми сеюмро аз они худ кард.

АКС: АМИТ «Ховар»

Март 29, 2023 16:50

Хабарҳои дигари ин бахш

САҲМИ МАН-ДАР ОБОДОНИИ ШАҲРИ МАН. Дар сойи Тебалайи Кӯлоб ҳашари тозакорӣ гузаронида шуд
Молу маҳсулотро дар «МегаФон Life» фармоиш диҳед ва «Пайкар» онҳоро то назди даратон бурда мерасонад!
Дар Швейтсария либосҳои миллӣ ва ҳунарҳои мардумии Тоҷикистон муррифӣ шуданд
САҲМ ГУЗОШТАН ДАР ОБОДОНИИ ВАТАН НИЗ ИБОДАТ АСТ. Сокини ноҳияи Айнӣ ба ҷойи адои ҳаҷҷи фарзӣ барои ҳамдеҳагонаш пули дарозиаш 6 метр сохт
Имрӯз дар Тоҷикистон ҳаво 23 дараҷа гарм мешавад
Дар ноҳияи Фирдавсии шаҳри Душанбе ташкилоти ҳизбии «Арвис» таъсис ёфт
Дар Суғд таҳкими муносибатҳои дӯстонаи Тоҷикистон ва Русия баррасӣ гардид
«ШАҲРИ МАН – ХОНАИ МАН». Дар ноҳияи Шоҳмансури шаҳри Душанбе 15 000 бех гули ороишии мавсимӣ шинонида шуд
Имрӯз дар Тоҷикистон ҳаво тағйирёбандаи бебориш мешавад
Дар Кумитаи ҳолатҳои фавқулода бо намояндаи Агентии давлатии назорати молиявӣ ва мубориза бо коррупсияи Тоҷикистон вохӯрӣ доир гардид
Имрӯз дар Тоҷикистон ҳаво 24 дараҷа гарм мешавад
Гурӯҳҳои корӣ ба сокинони шаҳри Роғун муҳтавои суханронии Президенти Тоҷикистон муҳтарам Эмомалӣ Раҳмонро фаҳмониданд