Дар Гимназияи тоҷикӣ-русии ба номи А. Пушкини ноҳияи Рӯдакӣ намоиш ва фурӯши китоб доир шуд

ДУШАНБЕ, 06.04.2023 /АМИТ «Ховар»/. Дар доираи Фестивали ҷумҳуриявии Ҳафтаи китоби кӯдакону наврасони Тоҷикистон, ки 2 апрел оғоз ёфт, дар Гимназияи тоҷикӣ-русии ба номи А. Пушкини ноҳияи Рӯдакӣ аз ҷониби Корхонаи воҳиди давлатии таъминот ва савдои «Китоб» намоиш ва фурӯши китобҳои асарҳои бачагона аз адабиёти тоҷик ва ҷаҳон баргузор гардид. Дар ин хусус АМИТ «Ховар» бо истинод ба Вазорати фарҳанги Ҷумҳурии Тоҷикистон хабар медиҳад.

Роҳбарияти корхонаи мазкур тазаккур дод, ки мақсади асосии баргузор намудани намоиш- ҷалби насли наврас ба мутолиаи китоб, ташаккули беҳтарин малакаҳои хониш, баланд бардоштани сатҳи фарҳанги иттилоотии кӯдакон ва ба ин восита дар замири онҳо тарбия намудани ҳисси ифтихори миллӣ, ватандӯстиву худогоҳӣ, гиромидошти арзишҳои милливу умумибашарӣ ва тарғиби тарзи ҳаёти солим мебошад.

Чунин намоишҳо дар баргузории озмунҳои ҷумҳуриявии «Фурӯғи субҳи доноӣ китоб аст», «Илм-фурӯғи маърифат», «Тоҷикистон -Ватани азизи ман», «Тоҷикон дар оинаи таърихи миллат», ки бо ташаббус ва сарпарастии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар миқёси ҷумҳурӣ ҳамасола доир мешаванд, нақши муҳим мебозад.

Ёдовар мешавем, ки фестивали имсола ба ифтихори 145- солагии сардафтари адабиёти муосири тоҷик, Қаҳрамони Тоҷикистон, устод Садриддин Айни баргузор гардида истода, дар доираи он озмуни беҳтарин иншо дар мавзӯи «Тоҷикистон Ватани Наврӯз аст», озмуни беҳтарин қироати шеър, достон, қасида, ғазал таҳти унвони «Ҷавҳари ҳастӣ сухан аст», «Хонандаи фаъолтарин»,«Ҳунар беҳтар аз зар бувад», «Умри Айнӣ аз барои халқ сарфи хома шуд» ва маҳфилҳои эҷодии адибони бачагона доир мешавад.

Дар ҷамъбасти фестивал ғолибону иштирокдорони фаъол бо диплому туҳфаҳои хотиравӣ қадршиносӣ карда мешаванд.

София ШОИК,
АМИТ «Ховар»

АКС: Вазорати фарҳанги Ҷумҳурии Тоҷикистон