ФАРЗАНДОНРО БЕНАЗОРАТ НАГУЗОРЕД! Се ноболиғ ҳангоми оббозӣ дар ҷойи мамнуъ ғарқ шудааст

ДУШАНБЕ, 24.04.2023 /АМИТ «Ховар»/. Дар Ҷумҳурии Тоҷикистон шабонарӯзи гузашта  се ноболиғ ҳангоми оббозӣ дар ҷойи мамнуъ дар обҳои мамлакат ғарқ шудааст. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании  назди Ҳукумати Ҷумҳурии Тоҷикистон хабар медиҳад.

Ин ҳодисаи фавқулода 23 апрел рух дода, ноболиғони 12, 13, 14-солаи  ғарқшуда сокинони ноҳияҳои Варзобу Ёвони вилояти Хатлон ва шаҳраки Бӯстони ноҳияи Мастчоҳ мебошанд.

Ба иттилои манбаъ, ҷасади писарбачаи 14-сола, сокини шаҳраки Бӯстони ноҳияи Мастчоҳ бо талоши кормандони бахши ноҳиявии Кумитаи ҳолатҳои фавқулода ва мудофиаи гражданӣ ва сокинони маҳаллӣ пайдо ва ба волидонаш супурда шуд.

Наҷотдиҳандагони Кумита барои пайдо кардани ҷасади духтарчаи 12-сола, сокини ноҳияи Ёвон ва писарбачаи 13-сола, сокини ноҳияи Варзоб субҳи имрӯз корҳои ҷустуҷӯиро идома доданд.

Ғайр аз ин як сокини деҳаи Асбоби Ҷамоати деҳоти Работи шаҳри Турсунзода ҳамроҳ бо се нафар дӯсташ дар минтақаи кӯҳии Чинордара истироҳат мекард ва аз баландӣ сарозер шуд. Дар бархӯрди шадид ӯ сахт захмӣ гашта, ҳангоми интиқол ба беморхона дар роҳ фавтидааст.

Дар иртибот ба ин ҳодисаҳо Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бори дигар аз сокинон хоҳиш мекунад, ки ҳангоми будубош дар минтақаҳои кӯҳӣ ва соҳили рӯдхонаҳо ба қоидаҳои бехтарӣ диққат диҳанд. Бачаҳоро беназорат нагузоранд, зеро дар натиҷаи бепарвоиву беназоратии волидон ин гуна ҳодисаҳои нохуши фоҷиавӣ  ба амал меоянд.

 АКС аз манбаъҳои боз