Президенти Ҷумҳурии Тоҷикистон Эмомалӣ Раҳмон дар ноҳияи Бобоҷон Ғафуров бо парвариши сабзавот шинос шуданд

Апрель 1, 2023 12:49

ДУШАНБЕ, 01.04.2023. /АМИТ «Ховар»/. 1 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Бобоҷон Ғафурови вилояти Суғд бо фаъолияти гармхонаи замонавии хоҷагии деҳқонии “Темурҷон” шинос шуда, аз намоиши маҳсулоти кишоварзӣ дидан намуданд.

Масоҳати умумии хоҷагӣ 1,5 гектар буда, дар як гектар барои парвариши сабзавот, хоса помидор, бодиринг ва қаламфур гармхона бунёд карда шудааст. Гармхонаро соҳибкори ватанӣ Илҳомҷон Иброҳимов ба хотири истиқболи сазовор аз ҷашни бузургу муқаддаси миллӣ, 35-солагии Истиқлоли давлатии Ҷумҳурии Тоҷикистон бунёд намудааст.

Ҳоло дар гармхона асосан бодиринги навъҳои гуногун парвариш меёбад. Ҳосилнокии солонаи навъҳои бодиринги киштшуда ба 2500-3000 сентнер баробар мебошад.

Технологияи гармхона истеҳсоли Ҷумҳурии Кореяи Ҷанубӣ буда, зироат ба таври қатрагӣ обёрӣ ва бо ғизо таъмин мегардад. Меъёри об ва ғизодиҳӣ тавассути компютер идора карда мешавад.

Дар дохили гармхона бо истифода аз 8 ҳазор лампаи махсуси барқӣ офтоби сунъӣ ба вуҷуд меоранд. Ин низоми нав дар Тоҷикистон бори аввал роҳандозӣ шудааст. Усули мазкур дар рӯзҳои абрнок ва барои дароз намудани рӯзҳои кутоҳи зимистон истифода шуда, ҷиҳати инкишофёбии хубу саривақтии зироат муфид мебошад.

Дар ҳудуди хоҷагӣ дар масоҳати 0,1 гектар гармхонаи алоҳида барои омода намудани кӯчати сабзавот бунёд намудаанд, ки дар як вақт 170 ҳазор кӯчат тайёр мегардад. Хоҷагидорон аллакай як маротиба 23 ҳазор кӯчати бодиринг, помидор ва қаламфур парвариш намудаанд. Ҳоло бошад, дар ин қитъа барои таҷриба 8 навъи помидор шинонидаанд, ки нашъунамои хуб доранд.

Барои муътадил нигоҳ доштани ҳаво дар гармхона низоми сардкунандаи обӣ васлу насб карда шудааст. Гармӣ дар ҳудуди иншоот тавассути низоми мутамарказ ва бо истифода аз ангиштсанг таъмин мегардад. Ҳоло дар хоҷагии деҳқонии “Темурҷон”-и ноҳияи Бобоҷон Ғафуров 20 нафар сокини маҳаллӣ бо ҷои кори доимӣ ва маоши хуб таъмин мебошад.

Президенти мамлакат муҳтарам Эмомалӣ Раҳмон ба соҳибкори маҳаллӣ барои бунёди чунин иншооти замонавии истеҳсолӣ изҳори сипос намуда, фаъолияти хоҷагидоронро намунаи ибрат ва боиси таҳсин маънидод карданд.

Сипас, Пешвои миллат муҳтарам Эмомалӣ Раҳмон аз намоишгоҳи маҳсулоти кишоварзӣ дидан карданд. Дар намоишгоҳ асосан сабзавоти дар гармхона парваришнамудаи хоҷагидорони ноҳияи Бобоҷон Ғафуров муаррифӣ гардид. Ба иттилои масъулони соҳа айни замон дар ноҳияи Бобоҷон Ғафуров 205 гармхонаи доимоамалкунанда дар масоҳати 27 гектар фаъолият мекунад. Бо назардошти талаботи замон хоҷагидорони ноҳия масоҳати гармхонаҳои типпи навро бештар намуда, кӯшиш доранд, истеҳсоли маҳсулотро дар ҳамаи фасли сол афзоиш бахшанд ва бо ин роҳ дар ғанӣ гардонидани бозор бо маҳсулоти сифатнок саҳм гузоранд.

Тақдими туҳфа ба 100 нафар ятим дар шаҳри Хуҷанд 01.04.2023

Апрель 1, 2023 12:49

Хабарҳои дигари ин бахш

ҶОМИ ОСИЁ-2024 ОИД БА ФУТЗАЛ. Тоҷикистон мизбони марҳилаи интихобии он мешавад
АҲСАНТ! Донишҷӯи Коллеҷи санъати шаҳри Душанбе Мария Чебоненко сазовори медали тиллои озмуни байналмилалӣ гардид
«КӮДАКОН-ДУНЁИ МОЯНД!». 1 июн дар шаҳри Душанбе барномаи бошукӯҳи фарҳангию фароғатӣ доир мешавад
Дар шаҳри Бӯстон Фестивали атласу адрас ва намоишу фурӯши он баргузор гардид
ҒАСБИ ХУДСАРОНАИ ЗАМИН ҶАВОБГАРИИ ҶИНОӢ ДАР ПАЙ ДОРАД. Иттилоияи Прокуратураи генералии Тоҷикистон дар ин маврид
Дар Минтақаи озоди иқтисодии «Данғара» корхонаи истеҳсоли тамоку бунёд мегардад
Дар Душанбе Озмуни 10-уми ҷумҳуриявии «Нозирони навраси ҳаракат дар роҳ» ифтитоҳ ёфт
ГРАН-ПРИИ ДУШАНБЕ-2023. Фонди ҷоизавии мусобиқа 100 ҳазор доллари амрикоиро ташкил медиҳад
КВОТАИ ПРЕЗИДЕНТИ ҶУМҲУРИИ ТОҶИКИСТОН. Тибқи он даври сеюми қабули довталабон ба муассисаҳои таҳсилоти олии касбии ҷумҳурӣ оғоз гардид
Роҳсозон мавзеъҳои мушкилтарини роҳи Қалъаихумб — Ванҷ — даромадгоҳи ноҳияи Рӯшонро ҳамвор намуда, ба ҳудуди қитъаҳои 4-5-и лоиҳа дохил шуданд
ФУТБОЛ. Дастаи мунтахаби олимпии Тоҷикистон (U-23) бо ҳамсолони худ аз Ҳонконг ду бозии дӯстона мегузаронад
ҲУШДОРИ ПРОКУРАТУРАИ ГЕНЕРАЛӢ: «Аз қаллобоне, ки аз номи ширкати «Газпром»-и Федератсияи Русия баромад мекунанд, эҳтиёт бошед»!