«РОҲ ВА УСУЛҲОИ РАСИДАН БА МУВАФФАҚИЯТИ КАСБӢ». Дар Душанбе Форуми байналмилалии рушди сармояи инсонӣ баргузор мешавад

ДУШАНБЕ, 23.04.2023. /АМИТ «Ховар»/. Бахшида ба Рӯзи ҷавонони Тоҷикистон, ки ҳамасола 23 май дар Ҷумҳурии Тоҷикистон гузаронида  мешавад, 16 май дар шаҳри Душанбе таҳти унвони «Роҳ ва усулҳои расидан ба муваффақияти касбӣ» Форуми байналмилалии рушди сармояи инсонӣ байни ҷавонон баргузор мегардад. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Ҳадаф аз баргузории форум фароҳам овардани имконият барои ҷавонони мамлакат дар самти баланд бардоштани донишу малака  буда, онҳо метавонанд тавассути ин форум малакаи касбӣ, технологияҳои рақамии молиявии IT ва стартапҳоро густариш диҳанд.

Форум имкон медиҳад, ки соҳибкорони ҷавон бо тарз ва усули нави ҷаҳони муосир огоҳ шуда, донишу маҳорати худро сайқал диҳанд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон