Таъмири асосии бинои Беморхонаи вилоятии ба номи Абдулмаҷид Ҳақназаров дар шаҳри Кӯлоб идома дорад

КӮЛОБ, 01.04.2023 /АМИТ «Ховар»/. Бо дастгирии Мақомоти иҷроияи ҳокимияти давлатии вилояти Хатлон болопӯши бинои Беморхонаи вилоятии ба номи Абдулмаҷид Ҳақназаров дар шаҳри Кӯлоб аз таъмири асосӣ бароварда шуд, хабар медиҳад мухбири минтақавии АМИТ «Ховар».

Айни замон бо фармоиши Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таъмири асосии қисмати берунии бино дар арафаи анҷомёбӣ қарор дорад.

Ёдовар мешавем, ки бинои мазкур бо иштироки Президенти Ҷумҳурии Тоҷикистон муҳтарам Эмомалӣ Раҳмон ҳанӯз соли 2004 мавриди истифода қарор гирифта, то инҷониб таъмир нагардида буд. Ба ин хотир бо ҷалби беҳтарин сохтмончиён бо истифода аз масолеҳи хушсифати сохтмонӣ қисмати берунии бино ба таври муосир таъмир гардид. Инчунин рӯзҳои наздик сохтмончиён ба сафолакпўш кардани гирду атрофи бино шуруъ менамоянд.

Беморхона, ки ба сокинони минтақаи Кӯлоб хизмати тиббӣ мерасонад, бо таҷҳизоти муосири тиббӣ муҷаҳҳаз гардонида шуда, беҳтарин мутахассисони соҳа ба аҳолӣ хизмати тиббӣ мерасонанд.

Роҳбарияти беморхона тасмим гирифтааст, ки утоқҳои бистарикунонӣ ва ҳамаи утоқҳои шуъбаҳои беморхонаро аз таъмири асосӣ барорад. Аллакай дар ин самт низ корҳо оғоз гардидаанд.

АКС: АМИТ «Ховар»