«ТАШХИС (ЭКСПЕРТИЗА) ВА АРЗЁБИИ КИТОБҲОИ ДАРСӢ». Дар Душанбе дастури методӣ муаррифӣ гардид

ДУШАНБЕ, 15.04.2023. /АМИТ «Ховар»/. 12 апрел дар Вазорати маориф ва илми Ҷумҳурии Тоҷикистон дастури методии «Ташхис (экспертиза) ва арзёбии китобҳои дарсӣ» муаррифӣ гардид, ки он аз ҷониби мутахассисони варзидаи соҳа таҳия шуда, дар баланд бардоштани сифати китоби дарсӣ ва мутобиқ сохтани он ба стандарту барномаҳои таълим ва талаботи қонунгузории ҷорӣ мусоидат менамояд. Дар ин хусус ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон хабар доданд.

Дастури мазкур ҳамчун  роҳнамо барои муаллифон, муҳаррирон, муқарризон ва гурӯҳҳои корӣ оид ба арзёбии адабиёти таълимӣ бори нахуст таҳия гардида, дар он талаботи меъёрӣ ба таълифи китоби дарсӣ ишора шудааст.

Дар он ҳамзамон масъалаҳои омилҳои муҳимтарини таъсиррасон ба арзёбии сифати китобҳои дарсӣ, усулҳои асосии методологияи таҳияи китобҳои дарсӣ, асосҳои миллии таҳияи китобҳои дарсӣ, ташхис (экспертиза) ва арзёбии китобҳои дарсӣ, таҳлили муқоисавии баъзе тақризҳо (интихобан), тавсияҳои методӣ барои муқарризон ва роҳҳои арзёбии китобҳои дарсӣ дарҷ шудаанд.

Инчунин ба Вазорати маориф ва илм аз ҷониби Маркази таҳия, нашр ва муомилоти китобҳои дарсӣ, илмию методӣ дастхати 25 номгӯй адабиёти таълимӣ барои муҳокима пешниҳод гардид. Аз ҷумла, 3 китоби дарсӣ ва 8 дастури методӣ барои зинаи таҳсилоти миёнаи умумӣ, 1 китоби дарсӣ барои муассисаҳои таҳсилоти миёнаи касбӣ, 12 китоби дарсӣ ва дастури таълимӣ барои муассисаҳои таҳсилоти олии касбӣ барои муҳокима пешниҳод карда шуд.

Роҷеъ ба ҳар дастур ва китоби барои баррасӣ пешниҳодшуда ба муаллифон фикру пешниҳодҳо ҷиҳати такмил иброз карда шуд.

АКС: Вазорати маориф ва илми Ҷумҳурии Тоҷикистон