Тоҷикистон ва Молдова таъсиси корхонаҳои муштарак ва нуқтаҳои савдои маҳсулоти агросаноатиро зарур донистанд

ДУШАНБЕ, 14.04.2024 /АМИТ «Ховар»/. 10 апрел дар шаҳри Кишинёв мулоқоти Сафири Тоҷикистон дар Молдова бо Президенти Палатаи савдо ва саноати Молдова баргузор гардид. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Зимни суҳбат ҷонибҳо роҷеъ ба ҳолати кунунии муносибатҳои дуҷониба ибрози назар намуда, ба тақвият додани ҳамкории тиҷоратию иқтисодӣ ва саноативу кишоварзӣ диққати махсус зоҳир намуданд.

Таъкид гардид, ки барои тавсеаи муносибатҳои мутақобилан судманд ҳар ду давлат зарфияти васеъ ва имконияти истифоданашуда доранд. Аз ин рӯ, ҷиҳати рушди ҳамкорӣ ва афзоиши ҳаҷми гардиши мол байни ду мамлакат таъсиси корхонаҳои муштарак ва нуқтаҳои савдои маҳсулоти агросаноатӣ, инчунин баргузор намудани форумҳои соҳибкорони Тоҷикистон ва Молдова зарур дониста шуд.

АКС: Вазорати корҳои хориҷии Ҷумҳурии Тоҷикистон