Ҳайати Тоҷикистон баргузории раъйпурсӣ дар Узбекистонро мусбат арзёбӣ намуд

ДУШАНБЕ, 01.05.2023 /АМИТ «Ховар»/. 30 апрел дар Ҷумҳурии Узбекистон бо мақсади қабули тағйиру иловаҳои нав ба Конститутсия раъйпурсии умумихалқӣ баргузор гардид, ки дар он ҳайати Ҷумҳурии Тоҷикистон ба ҳайси нозири байналмилалӣ иштирок намуд, иттилоъ доданд ба АМИТ «Ховар» дар Маркази тадқиқоти стратегии ҷумҳурӣ.

Дар ин чорабинии сиёсӣ ҳайати Ҷумҳурии Тоҷикистон, аз ҷумла директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода иштирок намуд.

Директори марказ зимни суҳбат бо намояндагони расонаҳои хабарии Узбекистон сатҳи баргузорӣ ва нақши ин санади сарнавиштсозро дар таъмини рушди минбаъдаи Ҷумҳурии Узбекистон мусбат арзёбӣ намуд.

Иттилоъ дода шуд, ки дар раъйпурсӣ аз 19414914 нафар, ки ҳуқуқи иштирок дар ин чорабинии сиёсиро дошт, 15802095 нафар иштирок ва раъй дод, ки ин беш аз 80%-ро ташкил медиҳад. Дар асоси тағйиру иловаҳои нав беш аз 65 дарсади матни Конститутсияи амалкунанда тағйир ёфта, шумораи моддаҳои он аз 128 ба 155 ва меъёрҳо аз 275 ба 434 расид.

Бояд тазаккур дод, ки дар Конститутсия принсипи давлатдории  Ҷумҳурии Узбекистон — «мустақил, демократӣ, ҳуқуқбунёд, дунявӣ ва иҷтимоӣ» муқаррар карда шудааст.

АКС: Хадамоти матбуоти Маркази тадқиқоти стратегии назди Президенти Ҷумҳурии Тоҷикистон