ҶАВОНӢ КУН, ҶАВОНӢ! Дар Донишкадаи давлатии санъати тасвирӣ ва дизайн барномаи фарҳангӣ доир шуд
ДУШАНБЕ, 23.05.2023. АМИТ /«Ховар»/. Дар Донишкадаи давлатии санъати тасвирӣ ва дизайни Тоҷикистон 22 май дар доираи ҳамкории Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раёсати кор бо ҷавонон ва варзиши шаҳри Душанбе ба муносибати Рӯзи ҷавонони Тоҷикистон бо иштироки васеи донишҷӯёну омӯзгорон намоиши тантанавии фарҳангӣ баргузор гардид, хабар доданд ба АМИТ «Ховар» дар донишгоҳи мазкур.
Дар оғоз роҳбарияти Донишкада аз саҳми муҳими ҷавонон дар рушди санъати тасвирии ҷумҳурӣ ёдовар шуд.
Намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон иброз дошт, ки Ҳукумати ҷумҳурӣ тайи солҳои соҳибистиқлолӣ ба масъалаи сиёсати ҷавонон диққати ҷиддӣ зоҳир менамояд. Тоҷикистон дар байни мамлакатҳои Иттиҳоди давлатҳои Мустақил аввалин шуда, дар бораи сиёсати ҷавонон қонун қабул намудааст.
Дар 31 соли соҳибистиқлолӣ дар ҷумҳурӣ барои ҷавонон якчанд имтиёз муқаррар карда шуд. Зиёда аз 40 ҳазор ҷавони тоҷик дар хориҷи мамлакат таҳсил мекунад. Сафи гирандагони идрорпулии президентӣ сол то сол афзоиш меёбад. Албатта, ҳамаи проблемаи ҷавононро дар муддати кӯтоҳ ҳал кардан мушкил аст. Бо вуҷуди ин Кумитаи кор бо ҷавонон ва варзиш барои ҳалли мушкилоти мавҷуда ва беҳтар кардани шароити кору таҳсили ҷавонон кӯшиши зиёд ба хорҷ медиҳад.
Ҷавонон бояд дар раванди ҷаҳонишавии муносибат ва урфу одатҳо зиракии сиёсиро аз даст надода, ба дасисабозии душманони миллат дода нашаванд. Ҳамеша ва дар ҳар куҷо Ватан, модар, зодгоҳ, муқаддасоти миллӣ ва миллати худро дӯст дошта, онро бо номи нек муаррифӣ намоянд.
Дар анҷоми ҳамоиш ба чанд корманд ва донишҷӯи фаъоли Донишкада сипоснома ва туҳфаҳои хотиравии Кумитаи кор бо ҷавонон ва варзиш, Раёсати кор бо ҷавонон ва варзиши шаҳри Душанбе ва ба як гурӯҳ донишҷӯён барои иштироки фаъолона дар озмунҳои ҷумҳуриявии «Фурӯғи субҳи доноӣ китоб аст», «Илм-фурӯғи маърифат» ва «Тоҷикон дар оинаи таърихи миллат» ифтихорномаҳо ва мукофоти пулии раёсат ва иттифоқи касабаи Донишкада супорида шуд.
Ба намоиш гурӯҳи муштараки ҳунарии Коллеҷи санъати ба номи Аҳмад Бобоқулов ва Донишкадаи давлатии санъати тасвирӣ ва дизайни Тоҷикистон бо рақсу таронаҳои дилнишин зинату тароват бахшид.
АКС: Донишкадаи давлатии санъати тасвирӣ ва дизайни Тоҷикистон
«Ҳар яки мо барои таҳкими ваҳдати сартосарӣ вазифадорем», — бардошт аз конференсия дар Донишгоҳи давлатии Кӯлоб
Бахшида ба таҷлили 2550-солагии Эъломияи ҳуқуқи башари Куруши Кабир дар Душанбе ҳамоиш доир шуд
Дурахши ситораҳо: дар Суғд мусобиқаҳои футболи кӯдакона доир гардиданд
Дар «Шарора» басти якуми истироҳат барои хонандагони ноҳияи Исмоили Сомонии пойтахт оғоз гардид
Кумитаи кор бо занон ва оила таҳти унвони «Ваҳдат – мароми модарон» конференсия доир менамояд
Дар басти аввал дар «Зимчуруд» 250 нафар кӯдакон ба истироҳат фаро гирифта шуданд
Имрӯз дар ноҳияҳои кӯҳии Тоҷикистон ҳаво то 33 дараҷа гарм мешавад
Донишкадаи ҳуқуқи Сибир барои шаҳрвандони Тоҷикистон квотаи таҳсил ҷудо намуд
Дар Душанбе бахшида ба Рӯзи Ваҳдати миллӣ ҳамоиши ҷумҳуриявӣ баргузор гардид
Имрӯз дар шаҳри Душанбе ҳаво то 32 дараҷа гарм мешавад
Дар шаҳри Панҷакент ҷамъоварии картошкаи барвақтӣ оғоз гардид
Дар ноҳияи Мир Сайид Алии Ҳамадонӣ оид ба пешгирии ҳолатҳои ғарқшавӣ корҳои фаҳмондадиҳӣ гузаронида шуд
