Ба хоҷагиҳои тухмипарварии Бадахшон картошкаи тухмии гурӯҳи элита дастрас гардид

ДУШАНБЕ, 02.05.2023 /АМИТ «Ховар»/. Картошкаи тухмии гурӯҳи элитаи «Кроне» ва «Галла» бо иловаи нуриҳои минералӣ ба хоҷагиҳои тухмипарварии Вилояти Мухтори Кӯҳистони Бадахшон дастрас  карда шуд. Дар ин хусус ба АМИТ «Ховар» дар Вазорати кишоварзии Ҷумҳурии Тоҷикистон хабар доданд.

Ин иқдом дар доираи ислоҳоти соҳаи кишоварзӣ ва амалӣ намудани Стратегияи давлатии таъмини амнияти озуқавории мамлакат дар доираи Лоиҳаи «Баланд бардоштани устувории кишоварзӣ» амалӣ гардид.

Ҳамзамон аз ҷониби мутахассисони Муассисаи давлатии «Рушди соҳибкорӣ дар соҳаи кишоварзӣ» оид ба тарзи кишти картошкаи тухмӣ  ва истифодаи нуриҳои минералӣ, инчунин риояи агротехникаи парвариши он барои хоҷагиҳои тухмипарвар  маслиҳатҳои муфид  дода шуд.

Ба гуфтаи мутахассисон, ин навъи картошкаи тухмии гурӯҳи элитаи «Кроне» ва  «Галла» ҳангоми риояи қоидаҳои агротехникӣ дар аксар минтақаҳои картошкапарварии мамлакат ҳосили фаровон дода, сабади истеъмолии мардумро бо ғизои лазиз таъмин мекунад.

АКС: Вазорати кишоварзии Тоҷикистон