Дар Афғонистон 2,3 миллион кӯдак метавонад бо норасоии ғизо рӯ ба рӯ шавад

ДУШАНБЕ, 19.05.2023 /АМИТ «Ховар»/. Тақрибан 90% аҳолии Афғонистон, аз ҷумла кӯдакон дар остонаи камбизоатӣ қарор доранд. Дар ин хусус намояндаи Хазинаи кӯдакони Созмони Милали Муттаҳид (ЮНИСЕФ) Фран Экиса дар брифинги матбуотӣ дар Ню — Йорк  хабар додааст,  иттилоъ медиҳад АМИТ «Ховар» бо истинод ба «Интерфакс».

Мувофиқи гуфтаи ӯ, соли 2023  2,3 миллион кӯдак метавонад бо камғизоӣ рӯбарӯ шавад, ки зимнан 175 ҳазор нафари он ба табобати ҳолате, ки бо норасоии ғизо алоқаманд аст, ниёз дорад.

Экиса илова кард, ки барои  татбиқи лоиҳаҳои башардӯстонаи ЮНИСЕФ оид ба дастгирии кӯдакони Афғонистон ҳоло танҳо 22% маблағи дархостшуда ҷудо карда шудааст.

«Мо аз ҷомеаи ҷаҳонӣ даъват менамоем, ки муттаҳид шуда, ба мо дар сабук кардани ранҷу азоби кӯдакон, занон ва оилаҳо дар Афғонистон кумак кунанд», — баён дошт ӯ.

Азиза ИКРОМ,
АМИТ «Ховар»

АКС аз манбаъҳои боз