Дар Ню Йорк вохӯрии навбатии Гурӯҳи дӯстони об оид ба натиҷаҳои Конфронси оби СММ баргузор гардид

ДУШАНБЕ, 18.05.2023 /АМИТ «Ховар»/. 17 май дар қароргоҳи СММ дар Ню Йорк вохӯрии давлатҳои аъзои Гурӯҳи дӯстони об ҷиҳати муҳокимаи натиҷаҳои Конфронси оби Созмони Милали Муттаҳид, ки 22-24 марти соли 2023 таҳти ҳамраисии Президенти Ҷумҳурии Тоҷикистон муҳтарам Эмомалӣ Раҳмон ва Шоҳи Нидерланд Виллем-Александр баргузор гардид, доир шуд.

 Дар вохӯрии мазкур иштирокдорон фикру мулоҳизаҳои худро нисбат  ба натиҷаҳои конфронс, аз ҷумла паёмҳои асосии он ва қадамҳои баъдӣ  иброз доштанд.

Намояндаи доимии Тоҷикистон дар СММ дар суханронии худ  муваффақона анҷом ёфтани конфронс, аҳаммият ва саҳми назарраси  натиҷаҳои он ба равандҳои  ҷаҳонӣ, аз ҷумла Форуми сиёсии сатҳи баланд оид ба рушди устувор, Саммити ҳадафҳои рушди устувор (сентябри 2023), Конфронси 28-уми СММ оид ба тағйирёбии иқлим ва Саммити оянда (2024)-ро таъкид кард.

АКС: Вазорати корҳои хориҷии Ҷумҳурии Тоҷикистон