Дар Вазорати корҳои хориҷии Тоҷикистон бо сафири Русия вохӯрӣ баргузор гардид

ДУШАНБЕ, 25.05.2023 /АМИТ «Ховар»/. 24 май дар Вазорати корҳои хориҷии Тоҷикистон бо Сафири Фавқулода ва Мухтори Федератсияи Русия дар Ҷумҳурии Тоҷикистон Семён  Григорев вохӯрӣ баргузор гардид. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

«Зимни мулоқот ба таваҷҷуҳи сафир нигаронии ҷониби Тоҷикистон аз маълумоти воридшуда дар бораи бо баҳонаҳои гуногун ба таври оммавӣ боздошт гардидани шаҳрвандони Ҷумҳурии Тоҷикистон дар қаламрави Федератсияи Русия расонида шуд», — таъкид намуданд дар Вазорат.

Ҳамзамон зарурати вокуниши якҷоя ба мушкилоти ҷойдошта ва пайдошаванда дар самти муҳоҷират ва аҳамияти андешидани амалҳои ҳамоҳангшуда дар таҳияи тадбирҳои имконпазири муштарак тазаккур дода шуд.

Зимни мулоқот инчунин ҳодисаи субҳи 19 май дар хобгоҳи № 3-и Муассисаи таҳсилоти олии буҷетии федералии давлатии «Донишгоҳи давлатии Комсомолски лаби Амур»-и минтақаи Хабаровски Федератсияи Русия бавуқуъомада, ки зимни он зиёда аз сад донишҷӯи тоҷики муҳассили донишгоҳи мазкур аз ҷониби мақомоти ҳифзи ҳуқуқи Русия мавриди бозпурсӣ ва муносибати бераҳмона қарор дода шуданд, муфассал баррасӣ гардид.

Таъкид карда шуд, ки чунин ҳодисаҳо ба руҳияи муносибатҳои шарокати стратегӣ ва иттифоқии Тоҷикистон ва Русия муносиб набуда, метавонанд ба талошҳои ҷонибҳо баҳри рушди минбаъдаи ҳамкорӣ дар соҳаи маориф зиён расонанд.

АКС: Вазорати корҳои хориҷии Ҷумҳурии Тоҷикистон