Раванди татбиқи Харитаи роҳ оид ба рушди сайёҳӣ дар шаҳри Қазон баррасӣ гардид

Май 19, 2023 19:01

ДУШАНБЕ, 19.05.2023 /АМИТ «Ховар»/. Дар ҳошияи Форуми Қазон 2023 «Русия – ҷаҳони ислом», ки 18-19 май дар шаҳри Қазони Ҷумҳурии Тотористон гузаронида шуд, вохӯрии раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муминзод бо вазири рушди иқтисоди Федератсияи Русия Максим Решетников доир гардид.

АМИТ «Ховар» бо истинод ба Кумитаи рушди сайёҳии назди Ҳукумати ҷумҳурӣ иттилоъ медиҳад, ки дар вохӯрӣ раванди татбиқи Харитаи роҳ оид ба рушди сайёҳӣ байни Кумитаи рушди сайёҳии назди Ҳукумати Ҷумҳурии Тоҷикистон ва Вазорати рушди иқтисоди Федерасияи Русия оид ба ҳамкорӣ дар самти сайёҳӣ, ки моҳи марти соли равон дар Душанбе ба имзо расида буд, баррасӣ шуд.

Таъкид шуд, ки санади мазкур ба тақвияти ҳамкорӣ байни мақомоти дахлдори соҳаи сайёҳӣ, ассотсиатсия ва ширкатҳои сайёҳии тарафҳо такони ҷиддӣ мебахшад. Ҷониби Русия таъкид намуд, ки иштироки намояндагони Тоҷикистон дар намоишгоҳҳо ва дигар чорабиниҳои байналмилалӣ дар самти сайёҳӣ, ки дар Русия баргузор мегарданд, барои ҷалби сайёҳон нақши муассир мегузорад.

Инчунин ҷонибҳо зимни мулоқот масъалаҳои саёҳати саломатиро баррасӣ намуданд. Гуфта шуд, ки Тоҷикистон дорои 200 чашмаи оби шифобахш ва термалӣ мебошад ва аз нуқтаи назари он ки дар ин осоишгоҳҳо бо нархҳои дастрас метавон муолиҷа гирифт, он барои ҷалби сайёҳони рус муҳим арзёбӣ мегардад. Дар ин росто, ба роҳ мондани ҳамкорӣ байни Федератсияи иттифоқҳои касабаи мустақили тарафҳо, курорту осоишгоҳҳо ва дигар ҷонибҳои манфиатдор ба мақсад мувофиқ мебошад.

Ҳамзамон ҷониби Русия таъкид сохт, ки Тоҷикистон на танҳо аз нуқтаи назари обҳои шифобахш, балки бо сайёҳии агро-эко ва гастротуризм низ давлати ҷалбкунандаи сайёҳон маҳсуб мешавад. Табиати рангоранг, меваҳои аз нуқтаи назари экологӣ тару тоза, таомҳои миллӣ ва мавзеъҳои таърихию фарҳангии мамлакати мо барои сайёҳони рус диққатҷалбкунанда мебошанд.


Пешниҳод шуд, ки барои шиносоӣ бо ин мавзеъҳо ва дигар имконоти сайёҳии Тоҷикистон гурӯҳи намояндагони ширкатҳои сайёҳии Русия ба Тоҷикистон омада, бо шароит ва тарзи муолиҷа дар ин осоишгоҳҳо ва дигар имконоти сайёҳии Тоҷикистон аз наздик шинос шаванд.

Ҳамзамон гуфта шуд, ки дар асоси банди 4 Харитаи роҳ дар айни замон ҳайати Тоҷикистон ҷиҳати муаррифии имконоти сайёҳии Тоҷикистон ба шаҳрҳои Русия рафта, бо намояндагони васеи ширкатҳои сайёҳии Русия вохӯриҳо анҷом дода истодааст. Таъкид шуд, ки барои дар сатҳи муносиб баргузор намудани ин чорабиниҳо ҷониби Русия кумаки амалӣ расонида, омодагии худро барои ҷалби ҳарчи бештари ширкатҳои сайёҳӣ ва дигар ҷонибҳои манфиатдор баён менамояд.

Инчунин мусоҳибон масъалаи ҷалби сармоя барои рушди инфрасохтори сайёҳӣ ва рақамикунонии соҳаро баррасӣ намуданд. Иброз дошта шуд, ки аз ҷониби Ҳукумати Ҷумҳурии Тоҷикистон барои сармоягузорон сабукиҳои молиявӣ, аз қабили озод гардидани ширкатҳо аз андоз аз фоида дар муддати 5 сол, озод гардидани воридоти масолеҳи сохтмонӣ аз пардохти гумрукӣ ва дигар сабукиҳо пешбинӣ гардидааст.

Инчунин аз ҷониби Русия даъват ба амал оварда шуд, ки дар Форум ва намоишгоҳи сайёҳии Тоҷикистон, ки моҳи сентябр дар Душанбе доир мешавад, фаъолона иштирок намоянд.

АКС: Кумитаи рушди сайёҳии назди Ҳукумати Ҷумҳурии Тоҷикистон

Май 19, 2023 19:01

Хабарҳои дигари ин бахш

МЕҲРГОН ЯКЕ АЗ ИДҲОИ БОСТОНИИ МИЛЛАТ. Иқтибосҳо аз суханрониҳои Президенти Тоҷикистон оид ба аҳамияти ин ҷашн
Ҳайати Тоҷикистон дар ҷаласаҳои гурӯҳи кишварҳои аъзои Хазинаи байналмилалии асъор ва Гурӯҳи Бонки ҷаҳонӣ иштирок намуд
Лоиҳаи бунёди хатти баландшиддати интиқоли барқи сабзи КАСА – 1000 дар қисмати Тоҷикистон, Қирғизистон ва Покистон ба анҷом расидааст
Дар Хатлон ҳаҷми истеҳсоли маҳсулоти саноатӣ беш аз 7 фоиз зиёд гардидаст
Тоҷикистон ва Узбекистон дар самтҳои рушди ҳукумати электронӣ, таҳияи платформаҳо ва ҳамгироии рақамӣ ба мувофиқа расиданд
Ҳамкории Тоҷикистон бо ширкатҳои амрикоӣ дар соҳаи инноватсия ва технологияҳои рақамӣ вусъат меёбад
Тоҷикистон ҷонибдори рушди ҳамкории байниминтақавӣ дар соҳаи захираҳои гидроэнергетикӣ аст
Сертификатсияи стандартҳои ESG барои кормандони Вазорати молия бо намояндаи Nasdaq баррасӣ гардид
Дурнамои таҳкими ҳамкории дуҷониба байни Тоҷикистон ва Русия дар соҳаҳои энергетика ва нафту газ баррасӣ шуд
Дар Душанбе масоили технологияҳои молиявӣ ва навовариҳо ҳамчун муҳаррики сармоягузорӣ баррасӣ гардид
Афзалияти стратегии Тоҷикистон дар самтҳои идоракунии устувори молияи давлатӣ, молияи «сабз» ва иқлим дар Амрико баррасӣ гардид
Ҳайати Тоҷикистон дар ҷаласаи пленарии VIII Форуми байналмилалии «Ҳафтаи энергетикии Русия» иштирок намуд