Бахшида ба 100-солагии Шоири халқии Тоҷикистон Аминҷон Шукӯҳӣ дар Академияи миллии илмҳо конфронс доир гардид

Июнь 7, 2023 14:47

ДУШАНБЕ, 07.06.2023. /АМИТ «Ховар»/. Имрӯз дар Академияи миллии илмҳои Тоҷикистон бахшида ба 100 -солагии Шоири халқии Тоҷикистон Аминҷон Шукуҳӣ конфронси илмиву амалӣ баргузор гардид. Конфронс таҳти унвони «Ҷойгоҳи Аминҷон Шукӯҳӣ дар адабиёти муосири тоҷик» доир шуд, хабар медиҳад мухбири АМИТ «Ховар».

Дар кори конфронс Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Эмомалӣ Насриддинзода, роҳбарони вазорату идораҳо ва олимону донишмандон иштирок намуданд.

Дар конфронс гуфта шуд, ки Аминҷон Шукӯҳӣ шоири чирадаст, яке аз чеҳраҳои барҷастаи адабиёти асри XX буда, дар осори ҷовидонааш раҳоварди бузурги дирўзу имрӯзи замонааш бо ифода ва андешаҳои баланди бадеию фалсафӣ ва ахлоқию инсонгароӣ ба риштаи тасвир оварда шудааст.

Аминҷон Шукӯҳӣ дар ҳама жанру навъҳои адабӣ асар эҷод намудааст. Фаъолияти адабии ӯ бо таълифи шеър оғоз гардида, дар тӯли умри худ 8 маҷмӯаи шеър нашр намудааст, ки тасвири масъалаҳои замон, ахлоқу одоби ҳамида, ишқи поки инсонӣ ва дӯстии халқҳо аз мавзӯоти асосии ашъори ӯ мебошад.

Таъкид карда шуд, ки дар эҷодиёти Аминҷон Шукӯҳӣ осори мансур мақоми хоса дошта, ҳикояҳои «Шаҳло ва Шифо», «Имзои шахсӣ», «Парии ҷазира», ки маҳсули каломи худи ӯ мебошад, мисоли ин гуфтаҳо мебошад. Инчунин саҳми ин шоири тавоно дар рушди адабиёти бачагона, публитсистика ва мақолаҳои интиқодӣ низ назаррас аст.


Бояд гуфт, ки Аминҷон Шукӯҳӣ ҳамчун шоири нозукбаён, сиёсатмадори барҷаста дар адабиёти тоҷик зуҳур карда, дар қатори дигар шоирон ба яке аз паҳлуҳои асосии адабиёти тоҷик-назм тозагиҳо ворид намудааст.

Зимни ифтитоҳи конфронс президенти Академияи миллии илмҳои Тоҷикистон Фарҳод Раҳимӣ баргузории солгарди бузургони илму адаб, сиёсат, маориф ва фарҳанги гузаштаву муосир, қадрдонӣ ва ҳифзи мероси адабӣ, фарҳангӣ таърихиву илмиро аз рукнҳои асосии сиёсати Ҳукумат ва давлати Тоҷикистони соҳибихтиёр дониста баён дошт, ки ин дастгириҳо бешубҳа аз сиёсати созанда, маорифпарварона ва фарҳангии Пешвои миллат муҳтарам Эмомалӣ Раҳмон сарчашма мегиранд.

«Маҳз тавассути сиёсати хирадмандонаи Сарвари давлат мо тавонистем дар даврони Истиқлолияти давлатӣ як силсила маъракаҳои муҳими илмию адабӣ ва фарҳангиро бо иштироки донишмандон ва коршиносони номии хориҷию ватанӣ дар сатҳи баланд баргузор намоем. Аз ҷумла, таҷлили ҷашни бошукӯҳи 1100 -солагии давлатдории Сомониён, 2700 — солагии китоби муқаддаси «Авасто», 1310 — солагии Имоми Аъзам, 2500- солагии Истаравшан, 2700- солагии Кӯлоб, 3000 -солагии Ҳисори шодмон, 5500 -солагии Саразми бостон, бузургдошти чеҳраҳои барҷастаи адабӣ, илмӣ, фарҳангӣ ва сиёсии гузшатаи дуру наздик- Борбад, устод Рӯдакӣ, ибни Сино, Носири Хусрав, Камоли Хуҷандӣ, Камолиддин Беҳзод, Мир Сайид Алии Ҳамадонӣ, Садриддин Айнӣ, Абдураҳмони Ҷомӣ, Нақибхон Туғрали Аҳрорӣ ва дигарон исботи ин гуфтаҳоянд. Ин чорабиниҳо на танҳо як мавриди бисёр муносиб ва хуб барои шинохти бисёр амиқ, таҳқиқ ва баррасии илму адаб ва фарҳанг мебошанд, балки воситами муассири дар заминаи арзишҳои миллии гузашта ва муосир тарбия намудани насли ҷавон ва баланд бардоштани сатҳи худшиносию худогоҳии миллӣ ба шумор мераванд. Ҳамоиши илмии имрӯза низ давоми мантиқии ингуна чорабиниҳо мебошад»,-афзуд Фарҳод Раҳимӣ.

Иштирокдорони конфронс иброз намуданд, ки осори Аминҷон Шукӯҳӣ на танҳо имрӯз, балки фардо низ барои миллати тоҷик, хусусан дар тарбияи насли наврас ва ҷавонон аҳамияти хосса дорад.

Шаҳлои САДРИДДИН,
АМИТ «Ховар»

АКС: Академияи миллии илмҳои Тоҷикистон

Июнь 7, 2023 14:47

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад