Дар Хоруғ зиёда аз 300 метри роҳи пиёдагарди шаҳр чароғон шуд

ДУШАНБЕ, 30.06.2023. /АМИТ «Ховар»/. Зиёда аз 300 метри роҳи пиёдагарди маҳаллаи Дашти Боло то маҳаллаи Хоруғи Болои шаҳри Хоруғ чароғон гардид, ки то ҳол ин мушкилоти асосии сокинони ин маҳаллаҳо ба ҳисоб мерафт. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Хоруғ хабар медиҳад.

Масъулин иброз доштанд, ки дар партави дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри фароҳам овардани ҳаëти шоиста барои ҳар як сокини мамлакат ва беҳтар намудани шароити инфрасохтор дар шаҳри Хоруғ низ корҳои ободонию созандагӣ вусъат меёбанд. Аз ҷумла, дар шаҳри Хоруғ марказҳои савдою хизматрасонӣ, бунгоҳҳои тиббӣ, мактабу кўдакистонҳо, майдончаҳои варзишии муосир бунёд ёфта, роҳҳо мумфаршу чароғон гардида, хизматрасонии нақлиёти ҷамъиятии мусофирбар беҳтар мешаванд ва масъалаи камбуди оби ошомиданӣ бартараф мегардад.

Сокинони ин маҳаллаҳо барои чунин ғамхориҳо ба Сарвари давлат ва роҳбарияти шаҳру вилоят изҳори миннатдорӣ намуда, ибрози итминон намуданд, ки дар ҷавоби ҳамаи ин дастгириҳои давлату Ҳукумати мамлакат дар вусъат додани корҳои созандагию бунëдкорӣ саҳми бештар мегузоранд.

Амалишавии ин иқдом дар дигар маҳаллаҳо низ идома хоҳад ëфт.

АКС: Мақомоти иҷроияи ҳокимияти давлатии шаҳри Хоруғ