Дар Осорхонаи миллии Тоҷикистон Намоиши II байналмилалӣ мусаввирони наврас ифтитоҳ ёфт
ДУШАНБЕ, 29.06.2023 /АМИТ «Ховар»/. 180 адад корҳои эҷодии мусаввирони наврас аз давлатҳои Ҳиндустон, Покистон, Афғонистон, Узбекистон, Тоҷикистон, Туркманистон ва Русия дар Намоиши II байналмилалӣ, ки имрӯз дар Осорхнаи миллии Тоҷикисон бо ташаббуси Муассисаи давлатии «Маркази кӯдакон ва наврасони шаҳри Душанбе» ва сарпарастии Мақомоти иҷроияи ҳокимияти давлатии шаҳри Душанбе ифтитоҳ гардид, ба маърази тамошо гузошта шуд.
Сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев ба АМИТ «Ховар» иттилоъ дод, ки дар маросими ифтитоҳи намоиши мазкур директори Муассисаи давлатии Осорхонаи миллӣ Зафаршо Иброҳимзода, директори Муассисаи давлатии «Маркази кӯдакон ва наврасони шаҳри Душанбе» Комил Раҳимӣ, устодону мусаввирони навраси кишварҳои хориҷӣ иштирок намуданд.
Дар ҷамъомад гуфта шуд, ки санъати рассомӣ воситаи муҳими инъикос ва тафсири бадеии воқеият буда, ба афкору эҳсоси бинанда таъсири бузург мерасонад. Мусаввирон тавассути истифодаи моҳиронаи рангҳо асарҳое меофаранд, ки барои дарки онҳо донистани забон ва тарҷумон лозим намебошад. Яъне, танҳо бавоситаи тамошо ва таваҷҷуҳи амиқ тамошобин мазмуни асар ва ҳадафи муаллифро пайхас менамояд.
Мавзуи асосии асарҳои мусаввирони наврас дӯстию муҳаббат, сулҳу субот, осмони софу беғубор, муҳити зист, тағйирёбии иқлим, ёдгориҳои таърихиву фарҳангӣ, об ва масоили марбут ба он буда, ба ин восита дидгоҳи худро нисбат ба ин масъалаҳо инъикос намуданд. Ин асарҳо ҳар як бинандаро ба ҷаҳони рангин, тахаюлоти бой ва орзуҳои кӯдакона ворид менамояд.
Ташкил ва баргузор намудани чунин намоиш байни наврасони давлатҳои хориҷӣ ба мустаҳкам гардидани муносибатҳои фарҳангӣ мусоидат намуда, барои боз ҳам беҳтару хубтар огоҳ шудан аз таъриху фарҳанги халқу миллатҳои ҳамдигар шароити мусоид фароҳам меорад.
Ҳамчунин аз ҷониби роҳбаладон ба мусаввирони наврас сайрҳои осорхонавӣ баргузор гардида, таърих, фарҳанг, табиат ва ҳунарҳои гуногуни тоҷикон ба онҳо муаррифӣ гардид.
Ёдовар мешавем, ки 26 июн дар шаҳри Душанбе Фестивали III байналмилалии эҷодиёти бадеии кӯдакон ва наврасон таҳти унвони «Истеъдодҳои наврас» оғоз ёфт. Нахуст ба хотири арҷ гузоштан ба таъриху тамаддуни тоҷикон иштирокчиёни Фестивал дар пояи муҷассамаи асосгузори давлати тоҷикон – Шоҳ Исмоили Сомонӣ гулчанбар гузоштанд.
Намоиши II байналмилалии мусаввирони наврас дар доираи ҳамин Фестивал роҳандозӣ гардид.
АКС: Осорхонаи милии Тоҷикистон
Пешвои миллат Эмомалӣ Раҳмон: «24 ёдгории таърихию фарҳангии Тоҷикистон ба Феҳристи мероси моддии ҷаҳонии ЮНЕСКО сабт гардидааст»
Президенти Тоҷикистон: «Мо барои арҷгузорӣ ба арзишҳои асили тамаддуни тоҷикону форсизабонон иқдомоти муассирро амалӣ намудем»
ШЕЪР ВА ИСТИҚЛОЛ. Назми муосири тоҷик дар солҳои соҳибистиқлолии Тоҷикистон дар сафи пеши худшиносии миллӣ ва ҳаракати ваҳдати миллӣ қарор гирифт
Кормандони соҳаи фарҳанг бо мукофотҳои давлатӣ сарфароз гардиданд
Се китоби рӯзномаи «Ҷумҳурият»: «Эмомалӣ Раҳмон ва эҳёи тамаддуни ориёӣ», «Бозгашти қаҳрамон» ва «Бозгашти қаҳрамон 2» муаррифӣ гардид
Конференсияи ҷумҳуриявии «Забон рукни муҳимми Истиқлоли давлатӣ ва ҳамбастагии ҷомеа» баргузор гардид
Дар Озмуни байналмилалии «Санъати китоб» «Шоҳнома»-и Абулқосим Фирдавсӣ сазовори Шоҳҷоиза гардид
35 СОЛИ СОҲИБИСТИҚЛОЛӢ. Дар Тоҷикистон соли 1991 танҳо 15 театр фаъолият мекард
«Эмомалӣ Раҳмон — муаррифгари таърихи ниёгон ва тамаддуни навини тоҷикон». Таҳти ин унвон китоб ба нашр расид
Дар шаҳри Душанбе маҳфили «Шоҳномахонӣ» баргузор шуд
«ТОҶИ СОМОН». Қабули филмҳо барои иштирок дар синамоҷашнвораи миллӣ то 15 сентябр идома меёбад
«МОДАРНОМА». Дар Осорхонаи миллӣ намоиши асарҳои Рассоми халқии Тоҷикистон Сабзаалӣ Шариф ифтитоҳ ёфт
