Имсол қисми дуюми бинои муассисаи таълимии №8-и шаҳри Хоруғ ба истифода дода мешавад

ХОРУҒ, 04.06.2023. /АМИТ «Ховар»/. Қисми дуюми бинои Муассисаи таҳсилоти миёнаи умумии рақами 8-и ба номи Сайфулло Абдуллоеви шаҳри Хоруғи Вилояти Мухтори Кӯҳистони Бадахшон мутобиқи нақшаи пешбинишуда дар остонаи 32-юмин солгарди Истиқлоли давлатии Ҷумҳурии Тоҷикистон мавриди истифода қарор дода мешавад. Дар айни ҳол дар ин иншооти барои соҳаи маориф хеле муҳими шаҳр зиёда аз 60 бинокор машғули кор мебошад. Дар ин хусус ба мухбири минтақавии АМИТ «Ховар» Файз Мирасан дар Мақомоти иҷроияи ҳокимияти давлатии шаҳри Хоруғ хабар доданд.

Мутобиқи лоиҳа, бинои муассисаи таълимӣ аз 3 қисм иборат буда, бинои аввал бо ширкати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавриди баҳрабардорӣ қарор гирифт. То оғози соли нави таҳсил қисми дуюми бино низ ба истифода дода мешавад. Бунёди ҳар се қисми биноро Ҷамъияти дорои масъулияти маҳдуди “Шариф ШС” бар уҳда дорад.

Сардори сохтмони бино Мирик Ҳилолов гуфт, ки “70 фоизи корҳои асосии сохтмонӣ ба анҷом расида, коргарон ба васлу насби дару тиреза, ноқилҳои баландшиддати барқӣ ва дегхонаи буғӣ машғул мебошанд. Як гурӯҳ коргарон бо истифода аз ду трактори пуриқтидор бинои кӯҳнаи муассисаи таълимиро ҳамвор карда, онро барои бунёди қисми сеюми бино омода мекунанд. Масолеҳи сохтмонӣ, аз қабили хишту семент, чӯбу тахта ва арматура сари вақт аз шаҳри Душанбе интиқол меёбад ва то имрӯз дар таъмини масолеҳи сохтмонӣ ягон мушкилӣ пеш наомадааст”.

Ҳоло хонандагон дар қисми аввали бино, ки барои 480 хонанда дар ду баст пешбинӣ шуда, аз 13 синфхона ва 7 кабинети фаннӣ иборат аст, таҳсил мекунанд. Дар синфхонаи компютерии муассиса, ки барои 24 хонанда пешбинӣ шудааст, 24 компютери насли нав мавҷуд аст ва хонандагон бе монеа аз ин таҷҳизоти хеле муҳими замони мусоир истифода мебаранд. Ба гуфтаи омӯзгорон, дар мактаби онҳо ба ҳар хонанда 1 компютер рост меояд, ки ин яке аз нишондиҳандаҳои беҳтарин дар саросари мамлакат мебошад. Бо истифода аз ин шароити мусоид сифати таълими фанҳои дақиқ дар муассисаи мазкур боз ҳам баланд гардида, хонандагон чанд сол пай дар пай дар олимпиадаҳои ҷумҳуриявию байналмилалӣ иштирок намуда, соҳиби ҷойҳои ифтихорӣ гардиданд.

Баъди пурра мавриди баҳрабардорӣ қарор гирифтани муассиса имконият пайдо мегардад, ки ҳамаи кӯдакону наврасони маҳаллаҳои Хоруғи боло, Андарситез ва Дашти боло дар як баст ба таълим фаро гирифта шаванд.

АКС: АМИТ «Ховар»