Китоби «Берунӣ ва Тахти Сангин – мояи ифтихори тоҷикон» рӯи чоп омад

ДУШАНБЕ, 30.06.2023 /АМИТ «Ховар»/. Имсол дар Тоҷикистон моҳи сентябр 2500-солагии шаҳристони Тахти Сангин ва даҳаи якуми моҳи октябр 1050-солагии алломаи Машриқзамин — Абурайҳони Берунӣ, ки ба Феҳристи ҷашнвораҳои байналмилалии ЮНЕСКО шомил шудаанд, таҷлил карда мешаванд. Ба ин муносибат маҷмӯаи «Берунӣ ва Тахти Сангин – мояи ифтихори тоҷикон» аз чоп баромад, хабар медиҳад мухбири АМИТ «Ховар».

Китоби мазкур аз ду фасл ва 184 саҳифа иборат мебошад. Дар он беҳтарин мақолаҳои донишмандони тоҷик, эҷодкорону муҳаққиқони шинохта гирдоварда шудааст, ки дар доираи озмунҳои эҷодии рӯзномаи «Хатлон» таҳти унвони «Абурайҳони Берунӣ — Алломаи Машриқзамин» ва «Тахти Сангин — рамзи таърихи пурғановати тоҷик» гулчин ва рӯи чоп омадаанд.

Китоби «Берунӣ ва Тахти Сангин – мояи ифтихори тоҷикон» ба алоқамандони таърих, илм, публитсистика ва доираи васеи хонандагон нигаронида шудааст, доир ба зиндагӣ ва осори шахсияти бузурги халқи тоҷик Абурайҳони Берунӣ, инчунин дар бораи шаҳраки Тахти Сангин ва дафинаи беҳамтои он маълумоти ҷолибу хонданиро фаро гирифтааст.

«Китоб дар омӯзиш ва шинохти беҳтари симои барҷастаи донишвари ҷаҳоншумули тоҷик, осори гаронбаҳои ӯ, гузаштаи пурифтихор, сабақҳои ибратомӯзи таърих ва саҳифаҳои дурахшони таърихи миллатамон мусоидат хоҳад кард», — омадааст дар муқаддимаи китоб.

АКС аз манбаъҳои боз