ТАЪТИЛИ БОФАРОҒАТ! Имрӯз истироҳатгоҳҳои беруназшаҳрии Душанбе дарҳои худро ба рӯйи кӯдакону наврасон боз намуданд

ДУШАНБЕ, 12.06.2023. /АМИТ «Ховар»/. Шуруъ аз имрӯз, 12 июн дар истироҳатгоҳҳои беруназшаҳрии «Гулхан»-и ноҳияи Сино, «Орзу»-и ноҳияи Фирдавсӣ, «Зимчуруд»-и ноҳияи Шоҳмансур ва «Шарора»-и ноҳияи Исмоили Сомонии пойтахт истироҳати тобистонаи кӯдакону наврасони шаҳри Душанбе оғоз мегардад. Дар ин хусус ба АМИТ «Ховар» дар Сарраёсати маорифи шаҳри Душанбе хабар доданд.

Ба иттилои манбаъ, истироҳатгоҳҳои беруназшаҳрӣ бо фарогирии 948 нафар, дар 36 майдончаи солимгардонии назди муассисаҳои таълимӣ 1440 нафар ва бо фарогирии 100 нафар кӯдакону наврасони аъзои маҳфилҳои Муассисаи давлатии «Маркази кӯдакон ва наврасони шаҳри Душанбе» ба фаъолият оғоз менамоянд.

Бояд гуфт, ки дар маҷмуъ дар 4 баст тибқи қарори Раиси шаҳри Душанбе аз 1 майи соли 2023 «Дар бораи ташкили истироҳати тобистонаи кӯдакон ва наврасони шаҳри Душанбе дар соли 2023» 10352 нафар — 4192 нафар дар истироҳатгоҳҳои беруназшаҳрӣ ва 6160 нафар дар майдончаҳои солимгардонии назди муассисаҳои таълимӣ аз 12 июн то 16 августи соли 2023 бо давомнокии 11 рӯз ройгон ба истироҳат фаро гирифта мешаванд.

АКС: Сарраёсати маорифи шаҳри Душанбе