ТОҶИКИСТОН ВА ҚАТАР. Шаҳрвандони дорои шиносномаҳои дипломатӣ ва махсус метавонанд дар қаламрави давлати якдигар бе раводид ба муддати на зиёда аз 90 рӯз шуруъ аз санаи вуруд қарор дошта бошанд

ДУШАНБЕ, 10.06.2023 /АМИТ «Ховар»/. Дар доираи сафари давлатии Амири Давлати Қатар Шайх Тамим ибни Ҳамад Олӣ Сонӣ ба Ҷумҳурии Тоҷикистон Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба бекор намудани талаботи раводид барои дорандагони шиносномаҳои дипломатӣ ва махсус, инчунин Ёддошти тафоҳум байни  Вазорати корҳои Ҷумҳурии Тоҷикистон ва Вазорати корҳои хориҷии Давлати Қатар оид ба ҳамкорӣ дар соҳаи таълим ва бозомӯзии кадрҳои дипломатӣ ба имзо расид.

Санадҳои мазкурро Вазири корҳои хориҷии Ҷумҳурии Тоҷикистон Сироҷиддин Муҳриддин ва Вазири давлатии корҳои хориҷии Қатар Султон Саъд ал-Мурайхӣ ба имзо расониданд.

Тавре ба АМИТ «Ховар» дар Вазорати корҳои хориҷии Ҷумҳурии Тоҷикистон шарҳ доданд, Созишнома оид ба бекор намудани талаботи раводид барои дорандагони шиносномаҳои дипломатӣ ва махсус бо мақсади соддагардони тартиби рафтуомади шарҳрвандони Ҷумҳурии Тоҷикистон ва Давлати Қатар, ки дорои шиносномаҳои дипломатӣ ва махсус мебошанд, равона гардидааст.

Тибқи Созишнома шаҳрвандони тарафҳо, ки барои Тоҷикистон дорандаи шиносномаҳои дипломатӣ ва барои Қатар дорандаи шиносномаҳои дипломатӣ ва махсус мебошанд, метавонанд дар қаламрави давлати якдигар бе раводид ба муддати на зиёдтар аз навад (90) рӯз шуруъ аз санаи вуруд қарор дошта бошанд.

Бозомӯзии кадрҳои дипломатӣ  ва мусоидат ба рушди захираҳои инсонии кормандони вазоратҳои корҳои хориҷии Тоҷикистон ва Қатар яке аз бахшҳои асосии Ёддошти тафоҳум байни  Вазорати корҳои Ҷумҳурии Тоҷикистон ва Вазорати давлатии корҳои хориҷии Давлати Қатар оид ба ҳамкорӣ дар соҳаи таълим ва бозомӯзии кадрҳои дипломатиро дар бар мегирад.

Ёддошти тафоҳуми мазкур ҷиҳати рушду таҳкими муносибатҳо тавассути ҳамкории зич байни мақомоти дипломатии ҳарду ҷониб ба имзо расидааст.

Ҳадафҳои санади мазкур таҳияи чаҳорчӯбаи ҳамкорӣ дар соҳаи таълиму тарбияи кадрҳои дипломатии вазоратҳои корҳои хориҷии тарафҳо, фароҳам овардани шароитҳои мусоид барои нигоҳ доштани алоқа ва ҳамкории доимӣ байни Вазоратҳо, мусоидат ба рушди захираҳои инсонии кормандони вазоратҳои корҳои хориҷӣ мебошад.

«Мубодилаи иттилоот оид ба давраҳои омўзиши дипломатӣ, барномаҳои бозомӯзӣ, машғулиятҳо ва чорабиниҳои таълимӣ, нашрияҳо, маводди чопии сохторҳои марбутаи давлатҳо дар соҳаи сиёсати хориҷӣ, муносибатҳои байналмилалӣ, ҳуқуқи байналмилалӣ, масъалаҳои байналмилалии иқтисодӣ ва  илмҳои сиёсӣ самти махсуси Ёддошти тафоҳум мебошад», — таъкид намуданд дар Вазорати корҳои хориҷии Ҷумҳурии Тоҷикистон.

Дар асоси ин Ёддошти тафоҳум инчунин, табодули устодонон дар самти мубодилаи дониши дахлдор ва таҷрибаи онҳо бо устодон ва донишҷӯён, кормандон ва ё шунавандагон ҷиҳати омӯзиши минбаъда дар давраҳои омӯзишии махсус оид ба забономӯзӣ, низоми сиёсӣ,  иқтисод ва тиҷорат, ҳуқуқ, муносибатҳои байналмилалӣ ва сиёсати хориҷӣ пешбинӣ шудааст.

Бояд тазаккур дод, ки дар доираи сафари давлатии Амири Давлати Қатар ба Ҷумҳурии Тоҷикистон дар маҷмӯъ 15 санади нави ҳамкорӣ дар соҳаҳои гуногун ба имзо расонида шуд, ки онҳо дар тақвияти равобити  Тоҷикистону Қатар нақши муассир хоҳанд гузошт.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»