Дар Душанбе Барномаи нави индикативии Иттиҳоди Аврупо барои солҳои 2021-2027 муаррифӣ гардид

ДУШАНБЕ, 22.07.2023. /АМИТ «Ховар»/. Имрӯз дар Вазорати рушди иқтисод ва савдо  Барномаи нави бисёрсолаи индикативии Иттиҳоди Аврупо барои солҳои 2021-2027-ро муаррифӣ карда шуд, хабар медиҳад АМИТ «Ховар» бо истинод ба Вазорати номбурда.

Дар чорабинӣ нахуст  ба иштирокчиён рӯнамои муфассали Барномаи нави  бисёрсолаи индикативии Иттиҳод барои солҳои 2021-2027 пешниҳод  шуд, ки дар доираи он самтҳои нави умедбахши ҳамкории бисёрҷониба, аз ҷумла маориф ва тандурустӣ, рушди иқтисоди «сабз» ва рақамӣ, расонидани кумаки техникӣ, ташкили ҷойҳои нави корӣ ва мусоидат дар ҳалли мушкилоти экологӣ баррасӣ гардиданд.

Таъкид шуд, ки Иттиҳоди Аврупо дар доираи барномаи қаблии худ барои солҳои 2014-2020 ба Тоҷикистон 251 миллион евро ҷудо намуда, инчунин бо дарназардошти паҳншавии пандемияи коронавирус ба соҳаҳои иҷтимоӣ иловатан 48 миллион евро маблағҳои грантӣ ҷудо намуд.

Пас аз анҷоми  машварат ҷонибҳо ба мувофиқа расиданд, ки минбаъд ҳам густариш ва истифодаи самарабахши ҳамкории бисёрҷонибаро дар соҳаҳои гуногуни иқтисодиёт идома диҳанд.

АКС: Вазорати рушди иқтисод ва савдои Ҷумҳурии Тоҷикистон