Дар Хуҷанд бо иштироки роҳбарони муассисаҳои нақлиётии Тоҷикистон мулоқот доир гардид

ДУШАНБЕ, 05.07.2023 /АМИТ«Ховар»/. Вазири нақлиёти Ҷумҳурии Тоҷикистон Азим Иброҳим дар шаҳри Хуҷанд бо намояндагони муассисаҳои нақлиётии боркашонию мусофирбарии мамлакат мулоқот намуд. Дар мулоқот масъалаҳои муҳими соҳа, аз ҷумла сохтмону нигоҳдории роҳҳо ва сифати боркашонию мусофирбарӣ мавриди баррасӣ қарор дода шуданд.

Тавре АМИТ «Ховар» бо истинод ба Вазорати нақлиёти мамлакат иттилоъ медиҳад, дар мулоқот роҳбарону фаъолони муассисаҳои нақлиётии вилоятҳои Суғд, Хатлон ва Бадахшон иштирок намуданд.

Дар ҷамъомад дар баробари ибрози дастовардҳои соҳа, ҳамчунин норасоиву камбудиҳо дар фаъолияти муассисаҳои нақлиётии мамлакат мавриди муҳокима қарор гирифтанд. Ба масъулин ҷиҳати бартарафсозии онҳо дар муҳлати кутоҳ супориш дода шуд.

Дар мулоқот Вазири нақлиёти ҷумҳурӣ аз ҷараёни корҳо ҷиҳати татбиқи барномаҳои давлатӣ дар соҳаи нақлиёти автомобилӣ изҳори қаноатмандӣ намуда, иброз дошт, ки ислоҳоти соҳа ба таври қатъӣ бо барномаҳои таҳияшуда мувофиқат мекунад.

Бояд гуфт, ки мулоқоти Вазири нақлиёти ҷумҳурӣ бо роҳбарону фаъолони муассисаҳои нақлиёти автомобилии мамлакат дар ду соли охир пайваста баргузор мегардад.

АКС: Вазорати нақлиёти Ҷумҳурии Тоҷикистон