Дар ноҳияи Фархор тоза намудани заҳбуру заҳкашҳо бо маром ҷараён дорад

ДУШАНБЕ, 19.07.2023. /АМИТ «Ховар»/. Бо мақсади паст намудани обҳои зеризаминӣ, кам кардани шӯршавии заминҳо ва баланд бардоштани ҳосилнокии зироат дар ноҳияи Фархор кандани заҳбуру заҳкашҳо бо маром идома дорад. Аз ҷумла, заҳбури КА-14-и деҳаи Муҳоҷирободи ҷамоати Дарқади ноҳия, ки чанд соли охир тоза нагардида буд, бо истифода аз техникаҳои муосир канда ва тоза шуда истодааст. Дар ин хусус АМИТ «Ховар» бо истинод ба маркази матбуоти Раиси ноҳия хабар медиҳад.

Ин заҳкаш дар масофаи 8 километр бояд тоза шавад. Дар айни ҳол корҳо дар ин самт оғоз гардида, аллакай 1 километри он тоза шудааст.

Кишоварзони ноҳияи Фархор, ки дар таъмини бозори истеъмолии вилояти Хатлон ва ҷумҳурӣ бо маҳсулоти кишоварзӣ нақши муҳим доранд, дар баробари агротехникии кишти зироат инчунин ба беҳдошти ҳолати мелиоративи заминҳои корам низ таваҷҷуҳи хосса зоҳир менамоянд.

Тоза кардани заҳбуру заҳкашҳо дар Ҷамоати деҳоти Дарқади ноҳия аз масоили ҳалталаб маҳсуб мешавад. Бо ин мақсад бо ташаббуси роҳбарияти ноҳия ҷиҳати бартараф намудани он иқдоми ҷиддӣ пеш гирифта шуда, тамоми заҳбуру заҳкашҳо тоза мегарданд.

АКС: Маркази матбуоти Раиси ноҳияи Фархор