Дар Роштқалъа роҳи муваққатӣ боз гардида, аз ду ҷониб корҳои ҳамворкунӣ идома дорад

ДУШАНБЕ, 03.07.2023. /АМИТ «Ховар»/. 27 июн дар натиҷаи фаромадани сели такрорӣ маҷрои дарёи Шохдара банд гардида, боиси зери об мондани 700 метр роҳи сатҳи ҷумҳуриявӣ гардид. Бо мақсади сари вақт бартараф намудани оқибатҳои офати табиӣ ва кушодани роҳ ҳайати гурӯҳи корӣ ба деҳаи Миденведи Ҷамоати деҳоти Барвози ноҳияи Роштқалъа рафта, бо ҷараёни корҳои барқарорсозӣ аз наздик шинос гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар медиҳад.

Баъд аз боздиди гурӯҳи кории Ҳукумати Ҷумҳурии Тоҷикистон таҳти роҳбарии Сарвазири мамлакат Қоҳир Расулзода аз рафти корҳои барқарорсозии роҳи мазкур, барои бунёди роҳи мошингард тавассути доманаи кӯҳҳои мушкилгузар ба масъулин дастур дода шуд, ки дар кутоҳтарин фурсат роҳи сатҳи ҷумҳуриявиро боз намуда, ҳаракати нақлиётро дар ин ҷода таъмин намоянд. Давоми ду шабонарӯзи охир роҳсозон бо истифода аз техникаи роҳсозӣ ба хатарҳои эҳтимолӣ нигоҳ накарда, роҳи муваққатиро боз карда, аз ду ҷониб ба корҳои тахту ҳамворкунӣ машғул мебошанд.

Бо мақсади вусъат бахшидани корҳои роҳсозӣ, масъулини Вазорати нақлиёти Ҷумҳурии Тоҷикистон, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар якҷоягӣ бо кормандони Муассисаи давлатии «Идораи хоҷагии роҳҳои автомобилгард»-и вилоят, ноҳия, инчунин кормандони Корхонаи воҳиди давлатии «Бадахшонроҳсоз» шабонарӯзӣ дар ин масир фаъолият менамоянд. Барои бо муваффақият анҷом додани корҳои роҳсозӣ дар ин самт 11 техника кор карда истодааст.

Ба масъулини роҳсозӣ ва аъзои комиссияи ҳукуматӣ ҷиҳати ҳарчӣ зудтар кушодани роҳи мазкур аз ҷониби роҳбарияти вилоят дастуру супоришҳои иловагӣ дода шуд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон