«РУШДИ СОҲАИ САЙЁҲӢ ДАР ТОҶИКИСТОН». Таҳти чунин унвон дар Хоруғ конференсияи ҷумҳуриявии сайёҳӣ оғоз ёфт

Июль 26, 2023 14:47

ДУШАНБЕ, 26.07.2023. /АМИТ «Ховар»/. 26 июл дар маркази Вилояти Мухтори Кӯҳистони Бадахшон- шаҳри Хоруғ бо  ташаббуси Кумитаи рушди сайёҳии назди Ҳукумати Ҷумҳурии Тоҷикистон ва Шурои ҷамъиятии Тоҷикистон таҳти унвони «Рушди соҳаи сайёҳӣ дар Тоҷикистон»  конференсияи илмӣ-амалӣ оғоз гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии Вилояти Мухтори Кӯҳистони Бадахшон иттилоъ доданд.

Нахуст ҳайати иштирокчиёни конференсия  намоишгоҳи дастовардҳои соҳаи сайёҳиро тамошо намуданд.

Дар конференсия масъалаҳо вобаста ба афзалияти соҳаи сайёҳӣ дар Вилояти Мухтори Кӯҳистони Бадахшон, обҳои шифобахш-омили рушди сайёҳӣ дар Бадахшон, тақвияти неруи инсонӣ, таъминоти кадрӣ ва шуғли пурмаҳсул дар соҳаи сайёҳӣ дар Вилояти Мухтори Кӯҳистони Бадахшон, роҳҳои рушди инфрасохтор дар Бадахшон, рушди сайёҳии кӯҳнавардӣ ва шикор дар Вилояти Мухтори Кӯҳистони Бадахшон ва ғайра баррасӣ шуд.

Таъкид карда шуд, ки табиати нотакрору биҳиштосо, таърихи бостониву ғанӣ, хосиятҳои шифобахши ҳаво ва чашмаҳои маъданӣ, фарҳанги хоси меҳмоннавозии мардум, меваҳои шаҳдбор, мавзеъҳои табиӣ ва таърихӣ Тоҷикистонро ба макони  зебоӣ ва фароғати сайёҳони дохилию хориҷӣ табдил додааст. Вилояти Мухтори Кӯҳистони Бадахшон дорои иқтидори бойи сайёҳӣ буда, дар оянда метавонад барои рушди туризми экологӣ ва таърихию фарҳангӣ саҳми намоён гузорад.

Иброз гардид, ки Ҳукумати  Ҷумҳурии Тоҷикистон таҳти сарварии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти рушди сайёҳӣ аҳамияти махсус зоҳир менамояд ва дар ин замина бо мақсади тавсеаи инфрасохтори соҳаи сайёҳӣ, муаррифии имконот ва захираҳои сайёҳии мамлакат ба оламиён тадбирҳои зарурӣ ва саривақтӣ андешида мешаванд.

Дар замони соҳибистиқлолӣ бо ташаббуси Президенти Ҷумҳурии Тоҷикистон дар қатори соҳаҳои дигари иқтисодиву иҷтимоӣ дар соҳаи сайёҳӣ низ ислоҳоти муҳим амалӣ карда шуданд.

Ҷумҳурии Тоҷикистон дар минтақае ҷой гирифтааст, ки аз лиҳози таърихӣ яке аз сарзаминҳои куҳани маскани инсоният маҳсуб мешавад. Ин сарзамине аст, ки бо маҳбубияти таърихии хеш диққати садҳо муҳаққиқу сайёҳони ҷаҳонро ҷалб намудааст. Маҳз ёдгориҳои бузурги таърихии давлати мо яке аз нишонаҳои таърихи куҳан доштани тоҷикон ва тамаддунофар будани ниёгони мо ба ҳисоб мераванд. Инҳо ёдгориҳое мебошанд, ки таърихи ташаккул ва рушди тамаддуни ниёгони тоҷиконро дар марҳилаҳои муайяни таърихӣ собит месозанд.

Дар конференсия гуфта шуд, ки имрӯз сайёҳӣ яке аз соҳаҳои сердаромади иқтисодиёти ҷаҳони муосир мебошад, ки дар таъмини аҳолӣ бо ҷои кор ва баланд бардоштани сатҳи зиндагии мардум нақши муҳим дорад. Бо ибтикори Президенти Ҷумҳурии Тоҷикистон муҳтарам Эмомалӣ Раҳмон соли 2018  бо мақсади пешбурд ва оммавигардонии соҳаи сайёҳӣ «Стратегияи рушди сайёҳӣ  барои давраи то соли 2030»  қабул гардид. Мақсади стратегияи мазкур таъмини рушди устувори соҳаи сайёҳии мамлакат ба ҳисоб меравад.

Конференсияи ҷумҳуриявӣ аз рӯи  3 панел ду рӯз идома меёбад.

АКС: Рӯзномаи «Нигини Хоруғ»

Июль 26, 2023 14:47

Хабарҳои дигари ин бахш

Дастовардҳои Тоҷикистон дар Форуми иқтисоди рақамии Созмони ҳамкории Шанхай-2025 муаррифӣ гардид
Дар ноҳияи Данғара корхонаи истеҳсоли маҳсулоти саноатӣ сохта мешавад
Имсол дар Бадахшон 45 корхонаву коргоҳҳои саноатӣ ба фаъолият оғоз намуд
Ҳайати Тоҷикистон дар ҷаласаи маҳдуди сатҳи вазирони иқтисоди СҲШ дар Чин иштирок намуд
Иттиҳоди Аврупо дар Тоҷикистон лоиҳаҳои соҳаи энергетикаро амалӣ менамояд
Дар Вазорати рушди иқтисод ва савдои Тоҷикистон татбиқи ташаббуси ҷаҳонии «Global Gateway» баррасӣ гардид
ДАРАИ АЛМОСӢ. Аз ҷониби ҷомеаи ҷаҳонӣ ҳамчун мавзеи беназири таърихии кишоварзӣ этироф гардид
Дараи Алмосии шаҳри Ҳисор расман ба феҳристи «Низоми мероси кишоварзии дорои аҳамияти ҷаҳонӣ» ворид карда шуд
Дар Бонки миллӣ бо ҳайати Дафтари Швейтсария оид ба ҳамкорӣ дар Ҷумҳурии Тоҷикистон вохӯрӣ доир гардид
Дар Хатлон масъалаи таъсиси корхонаи саноатии батареяҳои офтобӣ баррасӣ гардид
Имсол аз Тоҷикистон беш аз 90 ҳазор тонна маҳсулоти кишоварзӣ содирот гардидааст
Гӯсфанди зоти ҳисорӣ ва ангури гулобии тоифӣ аз Тоҷикистон ба феҳристи «Низоми мероси кишоварзии дорои аҳамияти ҷаҳонӣ» ворид карда шуд