Вазири нақлиёти Тоҷикистон дар Хуҷанд бо фаъолияти муассисаҳои боркашонии «Сайёд», «Сорбон» ва «Акмал» шинос гардид

ДУШАНБЕ, 06.07.2023 /АМИТ «Ховар»/. Вазири нақлиёти Ҷумҳурии Тоҷикистон Азим Иброҳим бо фаъолияти корхонаҳои нақлиётии шаҳри Хуҷанд – Ҷамъиятҳои дорои масъулияти маҳдуди «Сайёд», «Сорбон» ва «Акмал», ки бо ҳамлу нақли борҳои маҳаллӣ ва байналмилалӣ машғуланд, аз наздик шинос шуд. Дар ин хусус ба АМИТ «Ховар» аз Вазорати нақлиёти мамлакат иттилоъ доданд.

Вазири нақлиёт назару пешниҳодҳои роҳбарон ва намояндагони ширкатҳои нақлиётиро шунида, бо онҳо масъалаҳои ҳалталаби соҳа, аз ҷумла боркашонии байналмилалиро муҳокима намуд.

Дар суҳбат бо интиқолдиҳандагони хусусӣ мавзӯъҳои марбут ба танзими низоми боркашонӣ, рақамикунонии соҳа, истифодаи технологияҳои нав, васеъ кардани ҷуғрофияи боркашонӣ, риояи меъёрҳо ва қоидаҳо, ҳалли мушкилоти интиқоли бор аз як терминал ба дигар терминали боркашонӣ, беҳтар намудани сифати хизматрасонӣ ва дигар масъалаҳо баррасӣ гардиданд.

АКС: Вазорати нақлиёти Ҷумҳурии Тоҷикистон