Вусъати тадбирҳои ободонию бунёдкорӣ дар ноҳияи Восеъ ба истиқболи ҷашни Истиқлоли давлатӣ

ДУШАНБЕ, 29.07.2023. /АМИТ «Ховар»/. 28 июл Раиси вилояти Хатлон Давлаталӣ Саид бо ҷараёни корҳои сохтмонӣ дар иншооти ҷашнӣ бахшида ба 35-солагии Истиқлолияти давлатии Ҷумҳурии Тоҷикистон шинос шуда, дар ифтитоҳи бинои иловагӣ дар назди муассисаи таълимӣ  дар ноҳияи Восеъ иштирок  намуд. Дар ин хусус ба АМИТ «Ховар» дар Мақомоти иҷроияи  ҳокимияти давлатии вилояти Хатлон хабар доданд.

Зимни шиносоӣ бо ҷараёни корҳои сохтмонӣ дар бинои нави иловагӣ барои 480 ҷои нишаст дар назди муассисаи таҳсилоти миёнаи умумии №53, воқеъ дар шаҳраки Ҳулбук иттилоъ дода шуд, ки бо маблағгузории соҳибкор ва мақомоти иҷроияи ҳокимияти давлатии ноҳия бунёди муассисаи таълимии иборат аз 1 бино бо 1 блоки 2 — ошёна,  10 синфхонаи таълимӣ барои 480 хонанда дар ду баст ба нақша гирифта шудааст.

Дар бинои мазкур синфхонаҳои муҷаҳҳази фаннӣ, утоқи директор ва утоқи омӯзгорон мавҷуд буда, ҳамчунин майсазори атрофи бино бо дарахтони ороишиву сояафкан барои хонандагон  ба нақша гирифта шудааст.

Сохтмони муассисаи мазкур соли 2021 ба тариқи ҳашар  оғоз гардида, фармоишгари он Мақомоти иҷроияи ҳокимияти давлатии ноҳияи Восеъ буда, лоиҳаи иншоот бо тарҳи муосир аз тарафи КФ КВД “Лоиҳакаш” дар ноҳияи Восеъ таҳия ва тарҳрезӣ шудааст. Ба сохтмони муассисаи таълимӣ беш аз 15 нафар коргарони маҳаллӣ ҷалб шудаанд.

Роҳравҳои ҳавлии муассисаи таълимӣ ба масоҳати 300 метри мураббаъ сафолакпӯш ва атрофи муассиса бо 6 чароғаки равшанидиҳандаи замонавӣ чароғон гардидааст.

Раиси вилоят бо дигар иншооти дар доираи ҷашни 35-солагии Истиқлолияти давлатӣ сохташаванда шинос гардида, зимни он ба масъулин ва сохтмончиён барои бо сифати баланд ва дар муҳлати муайяншуда анҷом додани корҳои сохтмонӣ дастуру маслиҳатҳо дод.

АКС: Мақомоти иҷроияи ҳокимияти давлатии вилояти Хатлон