Қазоқистон ба Тоҷикистон дар рушди ҳукумати электронӣ ва иқтисоди рақамӣ кумак менамояд
ДУШАНБЕ, 25.08.2023 /АМИТ «Ховар»/. Дар Бонки миллии Тоҷикистон вохӯрии роҳбарони вазорату кумитаҳои калидии мамлакат бо ҳайати Ҷумҳурии Қазоқистон таҳти сарварии Вазири рушди рақамӣ, инноватсия ва саноати аэрокайҳонӣ Мусин Багдат баргузор гардид. Дар ин хусус ба АМИТ «Ховар» дар Бонки миллии Тоҷикистон иттилоъ доданд.
Дар ҷараёни вохӯрӣ ҷонибҳо масъалаҳои рақамикунонии хизматрасонии давлатиро мавриди баррасӣ қарор доданд.
Раиси Бонки миллии Тоҷикистон Ҳоким Холиқзода гуфт, ки сафари кории ҳайати Қазоқистон ба Тоҷикистон барои дар амал ҷорӣ намудани ҳукумати электронӣ ва ҳисоббаробаркунии ғайринақдӣ заминаи мусоид фароҳам меорад.
Таъкид гардид, ки Тоҷикистон ва Қазоқистон имрӯз қариб дар ҳамаи самтҳо муносибатҳои хуби корӣ ба роҳ мондаанд, ки он ба тавсеа ва таҳким ёфтани ҳамкорӣ дар бахши рушди хизматрасонии молиявии рақамӣ такони ҷиддӣ мебахшад.
Вазири рушди рақамӣ, инноватсия ва саноати аэрокайҳонии Ҷумҳурии Қазоқистон Мусин Багдат изҳор дошт, ки ҷамъомади имрӯза ба тақвияти татбиқи ҳукумати электронӣ кумаки амалӣ мерасонад.
Мавсуф афзуд, ки Қазоқистон имрӯз дар миқёси ҷаҳон аз ҷиҳати хизматрасониҳое, ки тариқи онлайн анҷом дода мешаванд, ҷои ҳаштум, аз рӯйи татбиқи ҳукумати электронӣ мавқеи даҳум ва аз лиҳози амнияти иттилоотӣ ҷойи сиюмро ишғол менамояд, ки ин аз сатҳи баланди рушди технологияи рақамии ин давлат гувоҳӣ медиҳад. Маҳз ба туфайли дар амал татбиқ гардидани ҳукумати электронӣ давоми чанд сол аст, ки дар Қазоқистон хизматрасониҳо, аз қабили ҳуҷҷатгузорӣ ҳангоми харидорӣ ва азнавбарасмиятдарории моликият, аз ҷумла амалӣ намудани харидуфурӯши моликияти манқул, воситаҳои нақлиёт, низоми маориф ва тандурустӣ, гирифтани иҷозатномаҳо барои шахсони воқеӣ ва ҳуқуқӣ, пардохтҳои андоз, сабти асноди ҳолати шаҳрвандӣ, гирифтани ипотека ва дигар ҳуҷҷатҳои зарурӣ ба таври рақамӣ ба расмият дароварда мешаванд. Дар вохӯрӣ ҳамзамон масъалаҳои амнияти пойгоҳи маълумот, коркард ва дастарасӣ ба онҳо баррасӣ гардиданд.
Ҷониби Қазоқистон таъкид намуд, ки омода аст таҷрибаи ғании худро ба мутахассисони соҳаи ҳукумати электронии тоҷик бо роҳи ташкили машғулият ва даврҳои омӯзишӣ дар Тоҷикистон ва ҳам дар Қазоқистон омӯзонад.
Дар анҷом роҳбарону намояндагони вазорату идораҳои ҷумҳурӣ дар робита ба рушди рақамикунонӣ ва ба таври электронӣ пешниҳод намудани хизматрасониҳо ибрози назар намуданд.
АКС: Бонки миллии Тоҷикистон
20 май — Рӯзи умумиҷаҳонии метрология: дар Тоҷикистон соҳаи метрология рушд меёбад
Раванди ислоҳоти низоми гумрукӣ ва татбиқи барномаҳои рақамикунонӣ бо Бонки ҷаҳонӣ баррасӣ шуд
Масоили омодагӣ ба баргузории Конфронси чоруми байналмилалии сатҳи баланд оид ба об баррасӣ гардид
Ҳайати Тоҷикистон дар саммити роҳбарони Форуми ҷаҳонии шаҳрҳо (WUF13) дар Боку иштирок намуд
Муовини Сарвазири Тоҷикистон бо фаъолияти кишоварзони ноҳияи Фархор шинос шуд
Дар Нишасти Гурӯҳи дӯстони пиряхҳо ташаббусҳои глобалии Тоҷикистон оид ба об ва ҳифзи пиряхҳо баррасӣ шуданд
Бонки миллии Тоҷикистон лоиҳаи озмоишии андозбандии соҳибкорони инфиродиро шарҳ медиҳад
Дар Душанбе рақамикунонии хизматрасониҳои молиявӣ, рушди қарздиҳии ипотекӣ ва маблағгузории «сабз» баррасӣ шуд
Тоҷикистон ба қатори 3 давлати пешсафи ислоҳотгари соҳаи савдо дар минтақаи Аврупо ва Осиёи Марказӣ дохил шуд
Ҳайати Тоҷикистон дар ҷаласаи 17-уми Гурӯҳи баррасии татбиқи Конвенсияи СММ оид ба мубориза бо коррупсия иштирок дорад
Муовини Сарвазири Тоҷикистон бо ҳолати фаъолияти пойгоҳи обкашии №17 дар ноҳияи Ёвон шинос шуд
ҚУРБИ АСЪОР: 1 евро аз 10.6100 то 10.8429 сомонӣ муқаррар шудааст
