Донишгоҳи давлатии ҳуқуқ, бизнес ва сиёсати Тоҷикистон аъзои Ассотсиатсияи донишгоҳҳои АвруОсиё гардид

ДУШАНБЕ, 14.08.2023. /АМИТ «Ховар»/. 2 март дар шаҳри Москваи Федератсияи Русия Шурои XV Ассотсиатсияи донишгоҳҳои АвруОсиё баргузор гардид, ки дар он Донишгоҳи давлатии ҳуқуқ, бизнес ва сиёсати Тоҷикистон ба  Ассотсиатсияи донишгоҳҳои АвруОсиё пазируфта  шуд. Ин нуктаро Ректори Донишгоҳи давлатии ҳуқуқ, бизнес ва сиёсати Тоҷикистон дар Хуҷанд Муъмин Шарифзода зимни баргузории нишасти матбуотӣ баён намуд. Дар ин хусус АМИТ «Ховар» бо истинод ба шуъбаи таҳлил ва робита бо ҷомеаи Донишгоҳ хабар медиҳад.

Мавсуф иброз дошт, ки ҳадафи Шурои Ассотсиатсияи донишгоҳҳои АвруОсиё- ин ташкили майдони гуфтугӯи байналмилалӣ барои муҳокима ва табодули таҷрибаи пешқадам дар самти инкишофи ҳамкорӣ байни муассисаҳои таҳсилоти олии давлатҳои Иттиҳоди Давлатҳои мустақил, дарёфт намудани ҳамкорон мувофиқи самтҳои фаъолият, инчунин баланд бардоштани сифат ва ташаккули фаъолияти касбӣ, ки ба рушди муассисаҳои таҳсилоти олии касбӣ мусоидат менамояд, мебошад.

Бояд гуфт, ки зимнан дар шумори донишгоҳҳои миллӣ ва омӯзгории шаҳри Душанбе ин сеюмин донишгоҳи Тоҷикистон аст, ки ба узвияти Ассотсиатсияи донишгоҳҳои АвруОсиё пазируфта шудааст.

Ҳамзамон дар нишаст гуфта шуд, ки донишгоҳи мазкур  бо донишгоҳи федералии Сибир, Донишгоҳи давлатии педагогии Нижний Новгород ба номи Минин, Донишгоҳи техника ва радиоэлектроникаи Беларус ва якчанд донишгоҳҳои Қазоқистон ва Узбекистон шартномаҳои ҳамкорӣ ба имзо расонид.

Ректори донишгоҳ илова намуд, ки соли равон ба ташкили Донишгоҳи давлатии ҳуқуқ, бизнес ва сиёсати Тоҷикистон 30 сол пур мешавад ва зарур аст, ки аз саҳифаҳои таърихии донишгоҳ ёдовар шавам.

Бахусус, соли 2008 бо ташрифи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оғоз ёфтани корҳои сохтмонӣ, соли 2011 дар вазъияти тантанавӣ ба истифода супоридани бинои нави таълимӣ, дар раванди корҳои созандагӣ ва таҷлили ҷашни бошукуҳи 30-солагии Иҷлосияи 16-уми Шӯрои Олии Ҷумҳурии Тоҷикистон ба истифода додани бинои Маркази таҳсилоти рақамии донишгоҳ бо тамоми шароити муосир ба мустаҳкам гардидани заминаҳои моддиву техникии донишгоҳ мусоидат намуд.

Ҳамзамон маротибаи нахуст байни муассисаҳои таҳсилоти олии мамлакат соҳиби шаҳодатномаи аккредитатсияи байналмилалӣ гардидани ихтисосҳои донишгоҳ, таъсиси марказҳои омӯзиши Аврупо ва забонҳо, маркази тестӣ, озмоишгоҳи инноватсионӣ, Парки технологӣ, таъсис ёфтани Шурои диссертатсионӣ дар назди донишгоҳ, ба фаъолият шуруъ намудани факултети муштараки Донишкадаи молияи Тошканд ва Донишгоҳи давлатии ҳуқуқ, бизнес ва сиёсати Тоҷикистон, ба истифода додани Маҷмааи варзишӣ, шомил шудани донишгоҳ ба узвияти донишгоҳҳои Созмони ҳамкории Шанхай, Лигаи донишгоҳии Созмони Аҳдномаи амнияти дастҷамъӣ аз дастовардҳои назарраси солҳои охир маҳсуб мешаванд.

АКС: Донишгоҳи давлатии ҳуқуқ, бизнес ва сиёсати Тоҷикистон