ОМОДАГӢ БА ЗИМИСТОН. Дар муассисаҳои тиббии шаҳри Бӯстон миқдори зарурии ангишту ҳезум захира гардидааст

ДУШАНБЕ, 20.08.2023. /АМИТ «Ховар»/. Дар​ Беморхонаи марказии шаҳри Бӯстон барои дар сатҳи зарурӣ гузаронидани давраи тирамоҳу зимистони солҳои 2023-2024 корҳои омодагӣ идома дошта, бархе аз шуъбаҳо, аз ҷумла шуъбаи бемориҳои кӯдакона аз таъмири куллӣ бароварда шудаанд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Дар муассисаҳои тиббии шаҳр миқдори зарурии​ ангишту ҳезум захира гардида, барои фаъолияти​ табибон шароити мусоид фароҳам оварда шудааст.​ ​

Раиси вилоят зимни боздид таъкид намуд, ки мақомоти иҷроияи ҳокимияти давлатии вилоят тибқи дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста кӯшиш ба харҷ медиҳад, то ғамхорӣ нисбат ба кормандони соҳаи тиб бештар гардида, дараҷаи хизматрасонӣ ба аҳолӣ баланд ва таъминоти муассисаҳои тиббӣ бо таҷҳизоту лавозимоти замонавӣ дар сатҳи зарурӣ бошад. Масъулини бахши тандурустии шаҳр низ бояд бо эҳсоси баланди масъулиятшиносӣ ба мардум хизмат расонанд.

Ба роҳбарияти шаҳр ва масъулини соҳаи нигаҳдории тандурустии шаҳр барои пурра ба охир расонидани омодагӣ ба зимистон супоришҳо дода шуд.

АКС: Хадмоти матбуоти Раиси вилояти Суғд