Вазорати адлияи Тоҷикистон: бақайдгирии 37 санад бинобар ба қонунгузории амалкунанда мухолифат доштан рад гардид

ДУШАНБЕ, 08.08.2023 /АМИТ «Ховар»/. Аз 98 санади барои санҷиш ва бақайдгирии давлатӣ воридгардида 50 санад сабт шуда, бақайдгирии 37 санад бинобар ба қонунгузории амалкунанда мухолифат доштан рад шуда, 11 санади боқимонда мавриди баррасӣ қарор дорад. Дар ин хусус имрӯз зимни нишасти матбуотӣ Вазири адлияи Ҷумҳурии Тоҷикистон Музаффар Ашуриён баён дошт.

Аз ин шумора дар 25 санад омилҳои бавуҷудоварандаи коррупсия ошкор шуда, дар 55 санад омилҳои бавуҷудоварандаи коррупсия ошкор нагардид, 5 санад дар баррасӣ қарор дорад.

Вазорати адлия ҷиҳати мутобиқнамоӣ ба талаботи Конститутсияи Ҷумҳурии Тоҷикистон ва қонунҳо ва бо мақсади бартараф намудани ихтилофу норасоиҳо дар санадҳои меъёрии ҳуқуқӣ 6 лоиҳаи қонун ва 2 лоиҳаи фармони Президенти Ҷумҳурии Тоҷикистонро таҳия намуд.

Дар нишаст гуфта шуд, ки ҳуқуқшиносони давлатии Муассисаи давлатии «Маркази ёрии ҳуқуқӣ» дар давраи ҳисоботӣ ба 4 ҳазору 989 шаҳрванд машварати ҳуқуқӣ пешниҳод намуданд, ки 195 нафар шахсони маъюб мебошанд.

Дар маҷмуъ дар 42 шаҳру ноҳия 39 ҳуқуқшиноси давлатӣ фаъолият доранд.

Раъно НУСРАТУЛЛО,
АМИТ  «Ховар»

АКС: АМИТ «Ховар»