БАХШИДА БА 32-СОЛАГИИ ИСТИҚЛОЛИЯТИ ДАВЛАТӢ. Дар ду деҳаи ноҳияи Рӯдакӣ биноҳои иловагии муассисаҳои таълимӣ ба истифода дода мешаванд

РӮДАКӢ, 04.09.2023 /АМИТ «Ховар»/. Ба ифтихори ҷашни 32-солагии  Истиқлолияти давлатӣ дар деҳаи Файзобаи Ҷамоати деҳоти Зайнабобод бинои иловагии муассисаи таълимии №82 бо 10 синфхона  ва дар деҳаи   Заркамари  Ҷамоати деҳоти Чоргултепаи ноҳияи Рӯдакӣ бинои иловагии муассисаи таълимии №77 бо 8 синфхона ба истифода  дода мешаванд. Дар ин хусус  ба хабарнигори минтақавии АМИТ «Ховар» Субҳониддини Маҳмуд  дар ҷамоатҳои  деҳоти Зайнабобод ва Чоргултеппаи ноҳияи Рӯдакӣ иттилоъ доданд.

Раиси деҳаи Файзоба Саидакбар Юнусов иброз дошт, ки “дар  деҳаи мо зиёда аз 450 хоҷагӣ зиндагӣ менамояд. Хушбахтона, имсол дар деҳаи мо аз ҳисоби шарикони рушд бинои иловагии муассисаи таълимӣ ва бинои  бунгоҳи тиббӣ сохта, ба истифода дода мешавад. Ҳамчунин чоҳи амудӣ канда истодаем, то ҳамаи хоҷагиҳои деҳаро бо оби нӯшокии тоза таъмин намоем”.

Тибқи иттилои Саидакбар Юнусов, дар муассисаи таълимии №82 зиёда аз 1600 хонанда аз 5 деҳа дарс мехонанд. Аз ҳисоби нарасидани ҷойи нишаст ва зиёд будани хонандагон муассисаи таълимӣ хонандагонро дар се баст қабул менамуд. Хушбахтона, бо сохтани бинои иловагӣ иборат аз 10 синфхона мушкилии асосии муассисаи таълимӣ бартараф мегардад.

Сармутахассиси Раёсати  маорифи ноҳияи Рӯдакӣ Асрор Қурбонов гуфт,   ки сохтони 172 синфхонаи иловагӣ дар назди 25 муассисаи таълимӣ идома дошта, 61 синфхонаи он бо 1525 ҷойи нишаст дар арафаи  ҷашни 32-солагии Истиқлолияти давлатӣ ба истифода дода мешавад. Ҳамчунин рӯзҳои наздик биноҳои нави муассисаҳои таълимии №3 ва №40 мавриди баҳрабардорӣ қарор дода мешаванд.

АКС: АМИТ «Ховар»