ДУШАНБЕ, 03.09.2023 /АМИТ «Ховар»/. Дар шаҳри Исфара бинои муассисаи таҳсилоти миёнаи умумии рақами 64-и деҳоти Чоркӯҳ ба истифода дода шуд, хабар медиҳад АМИТ «Ховар» бо истинод ба Хадамоти матбуоти Раиси вилояти Суғд.

Таъмиру навсозии бинои муассисаи мазкур дар маҳаллаи Сомониён бо дастгирии ҳамаҷонибаи мақомоти иҷроияи ҳокимияти давлатии вилоят ва шаҳри Исфара ва  саҳми соҳибкорону сокинони маҳаллӣ амалӣ гардид. Он барои 270 ҷойи нишаст пешбинӣ гардида, аз 7 синфхона, ҳуҷраҳои корӣ ва китобхона иборат мебошад. Синфхонаҳои нав бо лавозимоти зарурӣ – мизу курсӣ, тахтаи синфӣ ва рафҳои китобмонӣ муҷҷаҳаз гардонида шудаанд.

1 сентябр дар ҷамъомади тантанавие, ки бахшида ба Рӯзи дониш дар ин боргоҳи маърифат баргузор шуд, намояндагони мақомоти иҷроияи ҳокимияти давлатии вилоят ва шаҳр, роҳбарони мақомоти ҳифзи ҳуқуқ, раёсати маориф, падару модарон ва меҳмонони зиёде иштирок намуда, устодону шогирдонро ба муносибати оғози соли нави хониш муборакбод гуфтанд.

Иброз гардид, ки дар фарҳанги миллӣ ва инсонгароёнаи халқи шарафманди тоҷик масъалаи мактабу маориф, рушди босуботи илму маърифат, мавқеи ифтихорӣ ва тарбияи устоду омӯзгор, эҳтироми хат ва китоб, мунтазам баланд бардоштани сатҳи саводнокии мардум ва ба талаботи замона мувофиқу муносиб намудани он мақоми хосаю созандаро соҳиб мебошанд.

Дар Тоҷикистон низоми маориф ва таҳсил дар мақоми аввал қарор дошта, мактабу маориф такягоҳи давлат ва тарғибгари ғояҳои навини он ба ҳисоб мераванд.

АКС: Хадамоти матбуоти Раиси вилояти Суғд