«ҶОМИ ТОЗАГИИ АВРУОСИЁ». Дар Душанбе экомарафони байналмилалӣ доир мешавад

ДУШАНБЕ, 15.09.2023. /АМИТ «Ховар»/. Аз 16 то 24 сентябр дар шаҳри Душанбе экомарафони байналмилалии «Ҷоми тозагии Авруосиё»  баргузор мегардад, ки дар он зиёда аз 160 даста аз Тоҷикистон, Узбекистон, Қазоқистон, Қирғизистон, Озарбойҷон, Арманистон, Беларус, Молдова ва Русия иштирок менамоянд. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Ҳар даста байни ҳамдигар барои ҷамъ намудани партовҳо ва ба гурӯҳҳо ҷудо намудани онҳо қувва меозмоянд.

«Ҷоми тозагии Авруосиё» дар давлатҳои Иттиҳоди давлатҳои мустақил бо дастгирии Хазинаи грантҳои Президенти Федератсияи Русия гузаронида мешавад.

Дар Тоҷикистон «Ҷоми тозагии Авруосиё» бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи ҳамкорӣ бо Вазорати маориф ва илми Ҷумҳурии Тоҷикистон, намояндагии Россотрудничество дар Тоҷикистон, ташкилоти ҷамъиятии «Пайравони Пешвои миллат» ва ширкати Мегафон Тоҷикистон амалӣ гардидааст.

Дар доираи ин ибтикор дар Тоҷикистон муассисаҳои таҳсилоти олии касбии зерин байни ҳамдигар қувва меозмоянд:

— Донишгоҳи миллии Тоҷикистон,

— Филиали Донишгоҳи давлатии Москва ба номи М.В.Ломоносов дар шаҳри Душанбе,

— Академияи идоракунии давлатии назди Президенти Ҷумҳурии Тоҷикистон,

— Донишгоҳи славянии Тоҷикистон ва Русия,

— Донишгоҳи байналмиллалии забонҳои хориҷии Тоҷикистон ба номи Сотим Улуғзода,

— Филиали Донишгоҳи миллии тадқиқотии технологии «МИСиС»  дар шаҳри Москва.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон