Ҳайати Тоҷикистон дар нишасти 3-юми пленарии 25-умин Маҷмааи ҷаҳонии сайёҳӣ иштирок намуд

ДУШАНБЕ, 20.10.2023. /АМИТ «Ховар»/. 19 октябр дар шаҳри Самарқанди Ҷумҳурии Узбекистон нишасти 3-юми пленарии 25-умин Маҷмааи ҷаҳонии сайёҳӣ доир гардид, ки дар он ҳайати Ҷумҳурии Тоҷикистон иштирок намуд. Ҳайати намояндагони Ҷумҳурии Тоҷикистон дар рафти овоздиҳӣ ва қарори қабулҳои Маҷмаа бо назардошти сиёсати пешгирифтаи Ҳукумати Ҷумҳурии Тоҷикистон ва самтҳои афзалиятноки соҳаи сайёҳии мамлакат мавқеи худро муайян намуданд. Дар ин хусус ба АМИТ «Ховар» дар Кумитаи рушди сайëҳии мамлакат хабар доданд.

Дар нишаст якчанд масъалаҳо, аз ҷумла тамоюлҳои имрӯзаи соҳаи сайёҳии байналмилалӣ, татбиқи барномаи Созмон барои солҳои 2022-2023, барномаи корӣ барои солҳои 2024-2025, вазъи молиявии Созмон, баррасии сиёсати захираҳои инсонӣ дар соҳаи сайёҳии ҷаҳон, узвият дар Созмон, Кодекси байналмилалии ҳифзи сайёҳон, ҳисоботи Кумитаи Созмон оид ба аъзои ҳамроҳшуда мавриди муҳокима қарор дода шуданд.

Дар овоздиҳӣ ва қабули қарорҳо Раиси Кумитаи рушди сайëҳии назди Ҳукумати Ҷумҳурии Тоҷикистон Камолиддин Муминзод нозир интихоб шуда, ҷараёни онро пурра назорат ва шаффофиятро муайян намуд.

Дар анҷоми нишасти 3-юми пленарии Маҷмааи умумии Созмон бо ташаббуси Давлати Чили интихоботи Дабири Кулли Созмони ҷаҳонии сайёҳӣ барои солҳои 2026-2029 аз нав баркарор гардида, дар он давлатҳои аъзои Созмон аз нав овоз дода, мансаби Дабири кулли Созмон Зураб Пололикашвили тамдид гардид.

АКС: Кумитаи рушди сайëҳии назди Ҳукумати Ҷумҳурии Тоҷикистон