Дар Душанбе Форуми иқтисодиву тиҷоратии Тоҷикистон ва Қатар доир гардид

ДУШАНБЕ, 20.10.2023. /АМИТ «Ховар»/. 19 октябр дар доираи сафари расмии ҳайати Давлати Қатар ба Тоҷикистон таҳти роҳбарии муовини якуми Вазири рушди иқтисод ва савдо Ашурбой Солеҳзода ва Роҳбари бахши сармоягузориҳои Осиё ва Африқо дар Идораи сармоягузории Қатар, раиси Шурои директорони ширкати «Ooredoo Group» — Шайх Файсал ибни Сонӣ Оли Сонӣ Форуми иқтисодиву тиҷоратии Тоҷикистон ва Қатар баргузор гардид. Дар ин хусус ба АМИТ «Ховар» дар Вазорати рушди иқтисоди ҷумҳурӣ хабар доданд.

Зимни форум ҷонибҳо иброз намуданд, ки сафари давлатии Амири Давлати Қатар Шайх Тамим ибни Ҳамад Оли Сонӣ ба Ҷумҳурии Тоҷикистон 8 июни соли равон ва мулоқотҳои хосса бо Президенти Ҷумҳурии Тоҷикистон муҳтарам Эмомалӣ Раҳмон дар муносибатҳои дуҷонибаи байни давлатҳо саҳифаи нав кушод.

Дар ҷараёни форум имконоти сармоягузории Тоҷикистон, имконияти минтақаҳои озоди иқтисодӣ, рӯнамоҳои лоиҳаҳои афзалиятнок аз ҷониби Кумитаи ҳифзи муҳити зист, Саридораи геология, ҶДММ «Авесто Гурӯҳ», ҶСК «Ширкати алюминийи Тоҷикистон (ТАЛКО)» ва ҶДММ «Ғаюр Гурӯҳ» муаррифӣ гардид.

Илова бар ин ҷиҳати ҷалби маблағҳои қатарӣ дар якчанд лоиҳаҳои афзалиятнок, аз ҷумла «Фурудгоҳи байналмилалии мусофирбарӣ ва боркашонии Данғара», модернизатсияи «Корхонаи алюминийи Тоҷикистон (ТАЛКО)», сармоягузорӣ барои сохтмони «Неругоҳи барқи обии Роғун», «Неругоҳи барқи обии Шӯроб» ва таъсиси Маркази логистикӣ барои коркард, бандубаст, нигоҳдорӣ ва содироти маҳсулоти кишоварзӣ пешниҳод гардид.

Дар навбати худ Шайх Файсал ибни Сонӣ Оли Сонӣ ва ҳайати Давлати Қатар лоиҳаҳои аз ҷониби Тоҷикистон пешниҳодшударо хуш пазируфта, омодагии худро ҷиҳати оғози ҳамкорӣ дар татбиқи онҳо иброз намуд.

Дар анҷоми вохӯрӣ ҷонибҳо омодагии худро барои боз ҳам густариш додани ҳамкории дуҷониба ва таъмини майдони муколамаи доимӣ баён намуданд.

АКС: Вазорати рушди иқтисод ва савдои Ҷумҳурии Тоҷикистон