Дар Маҷлиси намояндагон бахшида ба Рӯзи забони давлатӣ ҳамоиш баргузор гардид

ДУШАНБЕ, 05.10.2023 /АМИТ «Ховар»/. Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бахшида ба Рӯзи забони давлатии Ҷумҳурии Тоҷикистон ҳамоиш баргузор гардид. Дар ин хусус АМИТ «Ховар» бо истинод ба Маҷлиси намояндагон хабар медиҳад.

Иброз гардид, ки забони давлатӣ маърифату фарҳанг, ахлоқу одоб, бинишу афкори ҳар миллатро чун ойина инъикос менамояд. Забони тоҷикӣ асоси ҳувияту худшиносии миллӣ ба шумор рафта, барои ҳар фарди тоҷик азизу муътабар мебошад, зеро танҳо ба василаи забони миллӣ метавон ҳофизаи таърихиву фарҳангиро пос дошта, пайванди хешро бо адабиёту фарҳанг ва илму дониши давоми ҳазорсолаҳо офаридаи гузаштагонамон эҳсос намуд.

Имрӯз бо ифтихору қаноатмандӣ гуфта метавонем, ки татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» муваффақона ва бомаром идома дорад.

Гуфта шуд, ки маҳз бо шарофати сиёсати фарҳангпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар даврони истиқлолияти давлатӣ забони тоҷикӣ ба арсаи байналмилалӣ баромада, имрӯз аз баландтарин минбарҳои сатҳи ҷаҳонӣ, аз ҷумла Созмони Милали Муттаҳид садо медиҳад, ки мояи ифтихори ҳар фарди миллат мебошад.

Ҳоло аз ҷониби Ҳукумати Ҷумҳурии Тоҷикистон барои рушду инкишофи забони давлатӣ шароити мусоид фароҳам оварда шуда, тамоми асноди қонунгузорӣ ва дигар санадҳои меъёрии ҳуқуқӣ бо забони тоҷикӣ таҳия мегарданд. Илова бар ин рӯзномаву маҷаллаҳо, китобҳои дарсиву таълимӣ, оммавию бадеӣ ба забони давлатӣ ба нашр мерасанд.

Имрӯзҳо ба шарофати соҳибистиқлолӣ забони тоҷикӣ дар тамоми қаламрави мамлакат мақоми шоиста пайдо намудааст. Албатта, арҷ гузоштан ба забони давлатӣ ва риояи меъёрҳои он шароит фароҳам месозад, ки сохтори он такмил гардад ва қонунмандии рушди забони давлатӣ тақвият ёфта, инкишофи бонизоми он таъмин шавад.

АКС: Маҷлиси намояндагони Маҷлиси Олии Ҷумҳурии Тоҷикистон