Дар Донишгоҳи давлатии тиббии Тоҷикистон Рӯзи Парчами давлатӣ бошукуҳ таҷлил гардид

ДУШАНБЕ, 22.11.2023. /АМИТ «Ховар»/. Дар Донишгоҳи давлатии тиббии Тоҷикистон ба номи Абуалӣ ибни Сино бо иштироки ҳайати профессорону омӯзгорон ва донишҷӯён бахшида ба Рӯзи Парчами давлатии Тоҷикистон ҷамъомади тантанавӣ баргузор гардид, хабар доданд ба АМИТ «Ховар» дар ин донишгоҳ.

Тазаккур дода шуд, ки ниёгони арҷманди мо ҳазорсолаҳо таҳти Парчами худ саф кашида, Ватану миллат, номусу озодӣ, забону фарҳангро ҳимоя намудаанд.

Меҳмонони ҳамоиш дар робита ба нақши Парчами давлатии Тоҷикистон дар баёни ормонҳои ҳазорсолаи халқи тоҷик ва соҳибихтиёрии Тоҷикистони соҳибистиқлол, асосҳои конститутсионию ҳуқуқии истифода ва ҳифзи Парчами давлатии Тоҷикистон андешаронӣ намуданд.

Изҳор шуд, ки муқаррар гардидани меъёри мушаххас оид ба рамзҳои давлатӣ, бахусус Парчами давлатии Тоҷикистон дар Конститутсияи Ҷумҳурии Тоҷикистон, қабулу дар амал татбиқ гардидани қонунгузорӣ дар бораи рамзҳои давлатӣ далели эҳтирому арҷгузорӣ ба муқаддасоти миллӣ ва пояндагиву ояндаи дурахшони Тоҷикистони соҳибистиқлол мебошад. Парчами давлатии Тоҷикистон дар Конститутсияи Ҷумҳурии Тоҷикистон рамзи давлатӣ муайяну муқаррар шуда, бо асосҳои қонунгузорӣ танзиму таҳким ва ҳифз мешавад.

Дар суханронии меҳмонону омӯзгорон вобаста ба решаҳои таърихии оини парчамдории халқи тоҷик ишораҳо шуда, арзёбӣ гардид, ки аз қадим то кунун парчам барои мардуми куҳанбунёди тоҷик рамзи давлатдориву ватандорӣ, таҷассумгари ҳувияти миллӣ, ифтихору шараф ва нангу номус ба шумор рафта, фарзандони сарсупурдаи халқамон барои ҳифзи он ҷоннисориҳо намудаанд. Дар замони муосир парчамдорӣ нишонаи соҳибихтиёриву соҳибистиқлолии миллату давлатро ифода менамояд.

Дар ҳамоиш гуфта шуд, ки бо мақсади боло гардидани эҳсоси ватандӯстии ҷавонон, ифтихор аз муқаддасоти миллӣ, рамзҳои давлатӣ ва хотирмон таҷлил намудани Рӯзи Парчами давлатии Тоҷикистон дар донишгоҳ барномаҳои гуногуни маърифативу сиёсӣ гузаронида мешаванд. Баргузор намудани чунин суҳбату музокира бо иштироки намояндагони мақомоти давлатӣ ва доираи васеи омӯзгорону донишҷӯён ба боло рафтани эҳсоси ватандӯстию худшиносии миллӣ ва иттиҳоду сарҷамъии миллат мусоидати фаъол менамояд.

АКС: Донишгоҳи давлатии тиббии Тоҷикистон ба номи Абуалӣ ибни Сино