Дар Суғд 167 ҳолати вайрон намудани қонуни танзим сабт гардид

ДУШАНБЕ, 13.11.2023 /АМИТ «Ховар»/. Дар даҳ моҳи соли равон дар вилояти Суғд ҳангоми баргузории санҷишҳо 167 ҳолати қонуншиканӣ  вобаста ба вайрон намудани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» сабт шудааст, хабар медиҳад АМИТ «Ховар» бо истинод ба шуъбаи дин, танзими анъана ва ҷашну маросим дар вилоят Суғд.

Дар ҳудуди вилояти Суғд дар умум 16 882 тӯю маросим гузаронида шудааст, ки нисбат ба ҳамин давраи соли 2022 16 ҳолати қонуншиканӣ  зиёд сабт шудааст. Дар ин давра дар шаҳру ноҳияи Панҷакент, Хуҷанд, Исфара, Истаравшан, Бобоҷон Ғафуров ва ноҳияи Деваштич тӯю  маъракаҳо нисбатан афзоиш ёфтааст.

Бояд гуфт, ки ин қонун асосан ба камхарҷ ва сарфакорона гузаронидани маъракаҳо, инчунин аз байн бурдани тӯю маросими дабдабанок нигаронида шуда бошад ҳам, мутаассифона, аз ҷониби баъзе сокинон то кунун дар ин самт қонуншиканиҳо вуҷуд доранд.

Тавре АМИТ «Ховар» қаблан хабар дод, дар нуҳ моҳи соли равон  тибқи маълумоти пешниҳоднамудаи комиссияҳои доимии танзими анъана ва ҷашну маросими мақомоти иҷроияи ҳокимияти давлатии вилоятҳо ва шаҳру ноҳияҳо дар ҳудуди ҷумҳурӣ 501 (дар ҳамин давраи соли гузашта 480) ҳолати қонуншиканӣ вобаста ба вайрон намудани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» сабт  шудааст, ки нисбат ба ҳамин давраи соли гузашта 21 ҳолат зиёд мебошад.

АКС аз манбаъҳои боз