Форуми тиҷоратии соҳибкорони Тоҷикистон ва вилояти Свердловски Федератсия Русия баргузор гардид

ДУШАНБЕ 29.11.2023/АМИТ «Ховар»/. 28 ноябр дар Душанбе Форуми тиҷоратии соҳибкорони Тоҷикистон ва вилояти Свердловски Федератсияи Русия баргузор гардид.

Дар ҷараёни ҳамоиш масъалаҳои кунунии ҳамкорӣ вобаста ба «Нақшаи чорабиниҳо оид ба рушди ҳамкорӣ байни Вазорати саноат ва технологияҳои нави Ҷумҳурии Тоҷикистон ва Ҳукумати вилояти Свердловск» баррасӣ гардида, ҳамчунин Протокол дар бораи ҳадафҳо дар таъсиси ҳамкорӣ байни Вазорати саноат ва технологияҳои нави Ҷумҳурии Тоҷикистон ва Ҳукумати вилояти Свердловск,  Созишнома байни Мақомоти иҷроияи ҳокимияти давлатии Вилояти Мухтори Кӯҳистони Бадахшони Ҷумҳурии Тоҷикистон ва Ҳукумати вилояти Свердловск дар бораи амалӣ намудани робитаҳои байналмилалӣ ва иқтисодии хориҷӣ дар соҳаҳои тиҷоративу иқтисодӣ ва иҷтимоию гуманитарӣ ба имзо расиданд.

Зимни натиҷагирӣ аз мулоқоту музокирот ҷонибҳо изҳори итминон намуданд, ки натиҷаи ин ҳамоиш ба рушди ҳамкории дуҷониба дар бахшҳои мухталифи иқтисоду тиҷорат мусоидати муассир менамояд.

АКС: АМИТ «Ховар»