Губернатори вилояти Свердловск бо фаъолияти Минтақаи озоди иқтисодии «Данғара» ва хоҷагиҳои лимӯпарварии ноҳияи Кушониён шинос шуд

ДУШАНБЕ, 30.11.2023 /АМИТ «Ховар»/. Губернатори вилояти Свердловски Федератсияи Русия Евгений Куйвашев дар ноҳияи Данғара бо фаъолияти Минтақаи озоди иқтисодии «Данғара» шинос шуд. Дар ин хусус ба АМИТ «Ховар» дар шуъбаи иттилоотию таҳлилии дастгоҳи Раиси вилояти Хатлон хабар доданд.

Таъкид гардид, ки барои ҷалби сармояи хориҷӣ ва ватанӣ ба иқтисодиёти мамлакат, баланд бардоштани иқтидори содиротӣ, таъмини рушди иқтидори иқтисодӣ, таъмини аҳолӣ ба ҷойи кор, ривоҷ додани ҳамкории иқтисодии байналмилалӣ, ворид намудани таҷҳизоту технологияҳои нав ва усулҳои нави идоракунии истеҳсолот ва ғайра ин таъсиси минтақаҳои озоди иқтисодӣ мебошад.

Иттилоъ дода шуд, ки бо Қарори Хукумати Ҷумҳурии Тоҷикистон ба маъмурияти Минтақаи озоди иқтисодии «Данғара» 521,37 га замин аз ҳудуди заминҳои ноҳия ҷудо шудааст, ки дар айни замон дар он 15 корхонаи саноатӣ фаъолият менамоянд. Ҳоло 369 нафар дар корхонаҳои ҳудуди Минтақаи озоди иқтисодии «Данғара» бо ҷойи кор таъмин мебошанд.

Дар ин ҷо коркарди якчанд маҳсулот, аз ҷумла истеҳсоли ресмонҳои дӯзандагӣ, матоъҳо ва маҳсулоти тайёр аз ресмони шоҳӣ ва пахтагин, коркарди пӯсти чорво, рангубор намудани матоъҳо ва истеҳсоли маҳсулоти тайёр ва маҳсулоти дӯзандагии пашмӣ, истеҳсоли курсию  мебел, истеҳсоли маҳсулоти гаҷӣ анҷом дода шуда, ба хориҷи мамлакат содирот мешавад.

Дар идомаи сафар ба вилояти Хатлон Губернатори вилояти Свердловски Федератсияи Русия Евгений Куйвашев бо фаъолияти хоҷагиҳои лимӯпарварии ноҳияи Кушониён низ шинос шуд.

АКС: Шуъбаи иттилоотию таҳлилии дастгоҳи Раиси вилояти Хатлон