Шаҳри Турсунзода дар номинатсияи «Шаҳрҳои беҳтарин»-и озмуни ҷумҳуриявӣ сазовори дипломи дараҷаи III гардид

ДУШАНБЕ, 04.11.2023 /АМИТ «Ховар»/. Шаҳри Турсунзода дар Озмуни ҷумҳуриявӣ оид ба муайян намудани «Беҳтарин шаҳру ноҳия, деҳот, деҳа, маҳали аҳолинишин ва хонаи истиқоматӣ» аз рӯйи номинатсияи «Шаҳрҳои беҳтарин» дар сатҳи ҷумҳурӣ «Беҳтарин шаҳр» ҳисобида шуда, сазовори дипломи дараҷаи III гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Турсунзода хабар доданд. 

Дипломро дар вазъияти тантанавӣ муовини Сарвазири Ҷумҳурии Тоҷикистон Сулаймон Зиёзода ба роҳбарияти Мақомоти иҷроияи ҳокимияти давлатии шаҳри Турсунзода тақдим намуд.

Таъкид гардид, ки озмуни ҷумҳуриявӣ бо мақсади тарбияи ҳисси зебоипарастӣ, ватандӯстӣ, ободкорӣ, эҳтиром ба арзишҳои миллӣ доир гардид.

Ёдовар мешавем, ки барои вусъат бахшидани корҳои бунёдкориву созандагӣ, ободу зебогардонии ҳамаи гӯшаву канори Тоҷикистон ва дар навбати аввал, таъмин намудани рушди ҳамаҷонибаи деҳоти мамлакат ба ифтихори 35 – солагии Истиқлоли давлатӣ гузаронидани озмунҳои шаҳру ноҳия, шаҳраку деҳот, деҳа, маҳали аҳолинишин ва хонаи беҳтарин амалӣ мешавад.

АКС: Мақомоти иҷроияи ҳокимияти давлатии шаҳри Турсунзода